Астанада Ұлттық ұлан сарбазы Ербаян Мұхтардың денесі жер қойнына тапсырылды

Астанада әскери борышын өтеу кезінде ауыр жарақат алып, ұзақ уақыт емделгеннен кейін көз жұмған Ұлттық ұлан сарбазы Ербаян Мұхтармен қоштасу рәсімі өтті, деп хабарлайды Orda.kz.      

Марқұмды ақтық сапарға шығарып салу рәсімі елордадағы Шейх Кунта Қажы мешітінде ұйымдастырылды. Жаназаға жүздеген адам – оның туыстары, жақындары, достары мен жанашыр қазақстандықтар жиналды. Сонымен қатар, мешітке бір автобуспен Ұлттық ұлан өкілдері мен әскери қызметкерлер де келді.

Жамағатпен жаназа намазы оқылғаннан кейін, Ербаянның мәйіті зиратқа жеткізіліп, жер қойнына тапсырылды.

Еске салсақ, Ұлттық ұлан сарбазы Ербаян Мұхтар өмірден озды. Қаралы хабарды Orda.kz редакциясына оның анасы жеткізді.

Бұған дейін Ербаянның жағдайы күрт нашарлап, Ұлттық шұғыл медицина үйлестіру орталығына жатқызылғаны хабарланған еді. Түркиядағы ұзақ емнен кейін беті бері қарағанымен, кейін денсаулығы қайта сыр берген. Отбасының мүддесін қорғайтын адвокат Инга Иманбайдың айтуынша, аурухана қызметкерлері ата-анасына хабарласып, Ербаянның жүрегі тоқтағанын айтқан.

Денсаулық сақтау министрлігі осы жағдайға қатысты ресми түсініктеме берді. Ведомство өкілдері ауыр жарақат салдарымен ұзақ уақыт күрескен жас жігіттің жақындарына көңіл айтты.

Сарбаз 23 маусым күні сағат 21:40-та қайтыс болған. Министрліктің мәліметінше, дәрігерлер Ербаянның өмірі үшін үш жылға жуық уақыт күрескенімен, оны аман алып қалу мүмкін болмаған. Осы уақыт бойы сарбаз қызмет кезінде алған бас-ми жарақатынан кейін вегетативті жағдайда жатқан.

Оқиғадан кейін Қорғаныс министрлігі Ербаян Мұхтардың өлімі бойынша қылмыстық іс қозғалғанын мәлімдеді.

Қорғаныс вице-министрі Қаныш Әбубәкіров бұл жағдай бойынша қылмыстық іс қозғалғанын мәлімдеді. Әбубәкір қазір уақытта тергеумен құқық қорғау органдары, соның ішінде ішкі істер министрлігі мен әскери прокуратура айналысып жатқанын да айтты. Сондай-ақ, оның айтуынша, тергеу барысында кінәлі тұлғалар анықталып, ұлттық ұлан қолбасшылығына қатысты тәртіптік шаралар қабылданады. 

Orda.kz редакциясына Ербаян Мұхтардың әкесі Хамит Мұхтар видеоүндеу жолдап, жұртты жалған ақпаратқа сенбеуге шақырды.

Әкесінің айтуынша, қазір Ербаянның отбасы Астанадағы мәйітхананың алдында жиналып тұр. Олар Ербаянның денесін алуға келген. Хамит Мұхтардың сөзінше, әзірге марқұмның мәйіті ашылмаған.

Оқи отырыңыз:

• • Ербаян Мұхтар қайтыс болды
  • Ербаян Мұхтардың өлімі бойынша қылмыстық іс қозғалды
  • Ербаянның қазасына қатысты ДСМ мәлімет берді: Науқастың жағдайы өзгермеді
  • Ербаян Мұхтардың әкесі жалған ақпаратқа сенбеуге шақырды: Отбасы мәйітхана алдында жүр