Премьер-министр қазақстандық мектептердің қауіпсіздігіне баға берді

Премьер-Министр Әлихан Смайылов Ішкі істер министрлігінде болып, жаңа оқу жылы қарсаңында қылмыстың алдын алу мен ашуда қолданылатын заманауи технологиялар, полиция жұмысын цифрландыру және мектеп қауіпсіздігін қамтамасыз ету шараларымен танысты.

Премьер-министрдің баспасөз қызметінің хабарлауынша, оған білім беру ұйымдарында, орталық білім беру мекемесінде және полицияның кезекші бөлімшелерінде орнатылған бейнекамералардың жазбалары мен дабыл түймелерінің сигналдары көрсетілді.

Қазір бұл шаралармен 3654 мектеп қамтылса, 7600 білім беру мекемесінде бейнебақылау орнатылған. Оларды қосу жұмыстары жалғасуда.

Сонымен қатар, Үкімет басшысы «Цифрлық полиция қызметкері» жобасы аясында сатып алынған жаңа бейнежетондардың жұмысын бағалады.

  Сондай-ақ Премьер-Министрге полицияға жол ережесін бұзғандарды анықтауға көмектесетін «Қорғау» жүйесінің ерекшеліктері туралы айтылды.

Сонымен қатар, Әлихан Смайылов тұрмыстық-зорлық-зомбылық үшін жауапкершілікті күшейту шараларының жүзеге асырылу барысымен, көші-қон саласындағы мемлекеттік қызметтерді көрсету жұмыстарының нәтижелерімен және интернет-алаяқтыққа қарсы тұру бойынша CyberPol жобасымен танысты.

Сондай-ақ, кадрлық үдерістерді автоматтандыру нәтижелері, сондай-ақ жедел қызметтің, қоғамдық тәртіпті қорғаудың және жалпы құқық бұзушылықтың алдын алудың өзекті мәселелері қаралды.