Кәрім Мәсімовтің бұрынғы күйеу баласы Азамат Қапенов қазақстандықтарға мәлімдеме арнады

Қазақстанда іздеуде жүрген, ҰҚК-нің бұрынғы басшысы Кәрім Мәсімовтің бұрынғы күйеу баласы Азамат Қапенов қазақстандықтарға мәлімдеме жасады. Ол өзіне қатысты «ақша ұрлап, Қырғызстанда жасырынып жүр» деген айыптауларға қатысты халыққа үндеу жолдады, деп хабарлайды Orda.kz.

Instagram желісінде жарияланған видеода Қапенов тағылған айыптарды жоққа шығарды. Оның айтуынша, ата-анасына тиесілі «Евротрансгрупп» компаниясы Достық станциясында ірі порт салып жатыр. Жобаға қажетті жер телімдерін, Қапеновтің сөзінше, Krisha.kz арқылы жеке тұлғалардан сатып алған, ал құрылыс несиелік қаражат есебінен жүргізілген.

«Құрметті қазақстандықтар, сіздерге үндеу жасаймын. Мен Қазақстанда ақша ұрлап, Қырғызстанда жасырынып жүр деген пікір тарады. Бұл шындыққа жанаспайды. Мәселені түсіндіріп өтейін. Менің ата-анама тиесілі «Евротрансгрупп» компаниясы Орталық Азиядағы ең үлкен портты салып жатыр. Ол Достық станциясында орналасқан. Аумағы – 51 гектар», – деді Қапенов. 

Ол сондай-ақ құрылыс мерзіміне назар аударды. Қапеновтың айтуынша, жұмыстар 2022 жылдың маусымында басталған, ол кезде Мәсімов жазасын өтеп жатқан. Бірінші кезең 2023 жылдың ақпанында аяқталып, содан кейін нысан табыс әкеле бастаған.

«Назар аударуларыңызды сұраймын, бірінші кезең 2023 жылдың ақпанында аяқталды. Сол кезден бастап нысан айына бір миллион АҚШ доллары көлемінде табыс әкеле бастады», – деді ол. 

Бұдан әрі Қапенов банк туралы айтып, рейдерлік жайында мәлімдейтінін жеткізді. Оның сөзінше, әңгіме кейін катарлық Lesha Bank-ке өткен Береке банк төңірегіндегі жағдай туралы болып отыр.

«Рейдерлік туралы, рейдерлікке қатысты арыздардың қалай қараусыз қалғаны жайлы айтамын. Алда көп қызық болады», – деді Қапенов. 

Бұған дейін Азамат Қапенов Қырғызстанда көзге түсіп, жергілікті төлқұжатын көрсеткені хабарланған еді. Оған дейін ол Біріккен Араб Әмірліктерінде болған. Қазақстанның Қаржы мониторингі агенттігі Қапеновті халықаралық іздеуді жалғастырып жатыр, сот сырттай оны қамауға алуға санкция берген.

Қапенов 2025 жылдың тамызында БАӘ-де ұсталған, алайда бір айдан кейін босатылған. Әмірліктер оны экстрадициялаудан бас тартқан, себебі қазақстандық тарап айыптауларды құжатпен дәлелдей алмаған.

Оқи отырыңыз:

• 5,2 млрд теңгеден астам шығын келтірген: Мәсімовтің бұрынғы күйеу баласына қатысты істің мән-жайы белгілі болды
• Миллиард болатын дау: Мәсімовтің қызы бұрынғы күйеуіне зәулім сарайды беруге мәжбүр болды
• Мәсімовтің күйеу баласына Антикор іздеу салды