Ұялы телефондарды тексеру мемлекет бақылауына өтеді

Мақұлданған заң жобасы абоненттік құрылғыларды верификациялауға мемлекеттік монополияны бекітеді, сондай-ақ ұялы телефондар нарығын «тазарту» шараларын енгізеді, деп хабарлайды Orda.kz.       

Верификацияға қатысты функцияны Мемлекеттік радиожиілік қызметінің қарамағына беру ұсынылады. Бұл шара тұтынушыларға сатып алынатын құрылғылардың түпнұсқалығы мен сапасына кепілдік алуға мүмкіндік береді, қоғамдық және дербес қауіпсіздікті арттырады, бизнеске адал бәсекелестік пен ашық баға белгілеу үшін жағдай жасайды, ал мемлекет үшін кедендік бақылауды күшейтеді және ұялы телефондарды ұрлау санын азайтуға көмектеседі.

Бұдан басқа, телекоммуникация желілерін халықаралық трафик транзитін орталықтандырылған басқару жүйелеріне өтпей ұйымдастыру, сондай-ақ рұқсат етілмеген трафикті өткізуге және байланыс желілерін заңсыз пайдалануға тыйым салуды енгізу ұсынылады.

Қазақстанда рұқсат етілмеген интернет-трафикті, соның ішінде Flash Call технологиясын (SMS орнына тіркелу немесе кіруді растау үшін қысқа қоңырау келуі) тыйым салу жоспарланып отыр. Бұл туралы Мәжіліс отырысында жасанды интеллект және цифрлық даму министрі Жасұлан Мәдиев мәлімдеді.

Заң жобасына сәйкес, рұқсат етілмеген трафик ретінде мыналар танылады және тыйым салынады:

• абонентті кері қоңырау шалуға мәжбүрлеу мақсатында дауыстық байланыс орнатуды көздемейтін жаппай қоңыраулар генерациясы (кіріс қоңырау бірінші қоңырау белгісінен кейін немесе оған дейін үзіледі);
• абоненттің алдын ала келісімінсіз жазылған дауыс хабарламаларын пайдалану арқылы автоматты жаппай қоңыраулар.

Байланыс операторлары мұндай трафикті анықтау үшін техникалық және ұйымдастырушылық шараларды енгізуге міндеттеледі.

Мәдиевтің айтуынша, мемлекет мобильді құрылғыларға қатысты бақылауды күшейтуді жоспарлап отыр.

«Азаматтарды телефон алаяқтарынан қорғау үшін біз заңды тұлғалардан келетін қоңырауларды таңбалауды енгіземіз, сонда адамдар ресми қоңырауларды күмәнділерден ажырата алады. Сонымен қатар, SIM-карталар мен байланыс құрылғыларын үшінші тұлғаларға беруге тыйым салынады. Бұдан бөлек, биометриялық сәйкестендіру ережелерін жаңартып, тіркеу кезінде мобильді құрылғыларды тексеруді күшейтеміз. Бұл «сұр» телефондардың санын азайтып, алаяқтық тәуекелдерін төмендетуге көмектеседі», — деді Мәдиев.

Өз кезегінде депутат Асхат Аймағамбетов те автодозвондар мен операторлардан келетін жарнамалық қоңырауларға шағымданды. Оның айтуынша, адамдарға қоңырау шалған адамның алаяқ па, әлде шынайы компания ма екенін ажырату қиын.

Министр бұл ұсынысты қарастыратынын айтты.

«Заң жобасы аясында біз заңды тұлғалар үшін қоңырауларды таңбалауды енгіземіз. Компанияларда реестр мен расталған нөмірлер болады, сондықтан адам өзіне кім қоңырау шалып жатқанын — мобильді оператор ма, банк пе немесе басқа ұйым ба — бірден көре алады. Бұл ресми қоңырауларды алаяқтық қоңыраулардан ажыратуға және телефон спамын азайтуға мүмкіндік береді», — деп қосты Мәдиев. 

Сонымен қатар, заң жобасы Қазақстанда алғаш рет «заттар интернеті желілері» ұғымын енгізеді. Олар елдің бірыңғай телекоммуникация жүйесіне қосылып, интернетпен, мобильді және спутниктік байланыспен біріктіріледі.

Тағы бірқатар өзгерістер қарастырылған:

• спутниктік байланысты дамыту;
• спутниктерді пайдалану ережелерін жаңарту;
• заттар интернеті желілерін реттеу;
• деректерді өңдеу орталықтарына арналған жаңа талаптар;
• байланыс нысандарын салу үшін әкімдіктердің өкілеттіктерін кеңейту.

Сондай-ақ, халықаралық интернет-трафик арнайы байланыс нүктелері арқылы өткізіліп, олар туралы деректер мемлекеттік техникалық қызметке беріледі.

Аталған телекоммуникация туралы заң жобасы бірінші оқылымда қабылданды.

Оқи отырыңыз:

• Қызылордада жатақханадағы студент өліміне қатысты қылмыстық іс қозғалды
• Бюджет қаражатын сайлауалды үгітке мақсатсыз пайдаланғандар бес есе артық қайтарады
• Иран келіссөздерді қайта бастау үшін АҚШ-қа бес талап қойды