Таразда рұқсаты жоқ жасөспірімдер көлікпен қашып, апатқа ұшырады

Таразда 15 жастағы жасөспірім рұқсатсыз әкесінің көлігін мініп шығып, полициядан қашып, адам өліміне әкелген жол-көлік апатына ұшырады, деп хабарлайды  Orda.kz КТК-ға сілтеме жасап.

Түнде кәмелетке толмаған бала әкесінің көлігін екі досымен бірге айдап шыққан. Сағат шамамен үштерде оларды полиция қызметкерлері байқап, тоқтауды талап еткен, алайда жасөспірім қашып кетуге тырысқан.

Полициядан қашқан ол көлікті басқара алмай, Audi маркалы автокөлік электр бағанына соғылған.

Алдыңғы жолаушы орнында отырған жасөспірім оқиға орнында қаза тапты. Екінші досы ауруханаға жеткізіліп, оған ота жасау қажет болған.

Ал көлікті басқарған жасөспірімнің өзі ауыр жарақат алмаған. Болжам бойынша, ол көлікті әкесінің рұқсатынсыз алып шыққан.

«Қылмыстық іс аясында көлік құралын басқаруға құқығы жоқ адамға тізгін ұстауға жол берген автокөлік иесінің жауапкершілігі қаралады. Сондай-ақ ата-аналар бала тәрбиесі мен бақылауды тиісінше атқармағаны үшін жауапқа тартылады», — деп мәлімдеді Жамбыл облыстық полиция департаменті. 

Бұған дейін Көкшетауда жол талғамайтын көлік тұрғын үй ауласында әйелді қағып, ол көз жұмғаны хабарланған еді. Кейін көлікті басқарған адамның  жүргізуші куәлігі болмағаны белгілі болды.

Оқи отырыңыз:

• Көкшетауда көлікпен әйелді жаншып өткен оқиғаға қатысты екі қылмыстық іс қозғалды
• 2027 жылы Астанада үстел теннисінен Әлем чемпионаты өтеді
• «Қазмырыш» зауытындағы жарылыстан зардап шеккен адам ауруханада қайтыс болды