Қордайда полиция қызметкерлерін қорлаған адамға айыппұл салынды

Жамбыл облысы Қордай ауданында полиция қызметкерлерін қорлаған ер адам сот шешімімен айыппұл арқалады, деп хабарлайды Orda.kz.

Іс Қылмыстық кодекстің 378-бабының 1-бөлігі — билік өкілін қорлау фактісі бойынша қаралған.

Сот материалдарына сүйенсек, оқиға 2025 жылдың желтоқсанында түнгі уақытта Қордай ауылындағы кафелердің бірінде болған. Сотталушы А. қызының дүниеге келуін достарымен бірге атап өтіп, ішімдік ішкен. Кафе әкімшілігі мекеменің жабылатынын бірнеше рет ескерткеніне қарамастан, ер адам ғимараттан кетуден бас тартқан.

Кейін оқиға орнына келген полиция қызметкерлерінің заңды талаптарына бағынбай, оларға қарсылық көрсеткен. Сонымен қатар, полицейлерді кафеде де, медициналық тексеру жүргізілген ауруханада да балағаттаған.

Сотта айыпталушы кінәсін толық мойындап, жасаған әрекетіне өкініш білдірген. Сондай-ақ жәбірленушілерден кешірім сұраған. Ал полиция қызметкерлері жазаны соттың қарауына қалдырған.

Прокурор соттан 40 сағат қоғамдық жұмыс тағайындауды сұраған. Алайда сот кінәні мойындауы, өкінуі және кәмелетке толмаған балаларының барын жеңілдететін жағдай ретінде ескеріп, айыппұл жазасын таңдады.

Сот үкімімен ер адам ҚК 378-бабының 1-бөлігі бойынша кінәлі деп танылып, оған 40 АЕК көлемінде айыппұл салынды.

Оқи отырыңыз:

• Кәрім Мәсімовтің бұрынғы күйеу баласы Азамат Қапенов қазақстандықтарға мәлімдеме арнады
• Елдегі экономикалық қылмыс жасағандар «масқара тақтасына» ілінеді
• Алматы хантавирус жұқтырудың ықтимал жағдайларына дайын — СЭБД