Германия экс-прокурор Дүйсеновті Қазақстанға экстрадициялаудан бас тартты

07 ақпан 2026 13:03 Ләззат Сұңқар

Коллаж: Orda.kz

Германия соты қазақстандық тергеу органдарынан бой тасалап жүрген бұрынғы прокурор Мақсат Дүйсеновті босатты, деп хабарлайды Orda.kz AGRA құқық қорғау ұйымына сілтеме жасап.

Сот Дүйсеновке қатысты қудалау саяси себептерге байланысты болуы мүмкін деген қорытындыға келген. Қазіргі таңда ол бостандықта. AGRA өкілдерінің нақтылауынша, Қазақстанның оны экстрадициялау жөніндегі сұрауы ресми түрде күшін жойған.

Бұған дейін Германияда экс-прокурор саяси баспана беру туралы өтініш берген. Қазақстан тарапынан экстрадиция сұратуға негіз болған қылмыстық іс аясында Дүйсенов 22 миллион АҚШ доллары көлемінде пара алу, қылмыстық жолмен алынған табысты заңдастыру және алаяқтық баптары бойынша айыпталған.

Қорғау тарапының айтуынша, бұл іс қоғамда кең резонанс тудырған, ал сот процесі сыртқы қысыммен қатар жүрген.

«Қазақстан бұқаралық ақпарат құралдарында, билікке жақын әрі оппозициялық та медиада, Дүйсеновке қатысты аса жағымсыз сипаттағы материалдар жарияланды. Бұл ақпараттық науқанның ауқымы мен бір мезгілде жүргізілуі қорғау үшін маңызды дәлел болды және соттан тыс қысымның бар екенін көрсетті», деп атап өтті AGRA.

Қазақстан билігі экс-прокурорды экстрадициялауға қатысты талаптарын жалғастыра ма, жоқ па — әзірге белгісіз.

Еске сала кетейік, Дүйсеновті Қазақстанның сұрауы бойынша Интерпол Германия аумағында ұстаған. Ол елден атышулы «Қорғас ісі» бойынша тергеу басталғаннан кейін кеткен. Бұл іс аясында экс-прокурор негізгі куәгерлердің бірі болған.

Мақсат Дүйсенов Қайрат Қожамжаров командасымен тығыз байланыста болған. Қожамжаровқа қызметтік өкілеттігін асыра пайдалану және қылмыстық жолмен алынған қаражатты жылыстату айыптары тағылған. Оның басшылығы кезінде Дүйсенов жоғары лауазымды қызмет атқарып, бастығы сенатқа кеткенге дейін бірқатар резонансты істерге қатысқан.

Тақырыпқа сай ұсынамыз:

Жаңалықтар

барлық жаңалықтар