«Қожамжаровтың адамы»: Бұрынғы бас көлік прокуроры Германияда ұсталды

Германияда Қазақстанның өтініші бойынша бұрынғы прокурор Мақсат Дүйсенов ұсталды. Шұғыл ақпарат Бас прокуратура мен президент әкімшілігінің басшылығына жеткізілді, деп хабарлайды Orda.kz. 

Orda.kz дереккөзінің мәліметінше, бұрынғы бас көлік прокуроры ұсталған кезде жалғыз болмаған. Сонымен қатар, ҚР Ішкі істер министрлігі ақпаратты растады. 

Оны неміс құқық қорғау органдары Интерпол желісі бойынша халықаралық ынтымақтастық аясында қамауға алды. 

Дүйсеновтің мансабы қаржы полициясы және сыбайлас жемқорлыққа қарсы органдармен тығыз байланысты. Ол Қайрат Қожамжаровтың тобындағы адамдардың бірі. Дүйсенов қаржы полициясында негізгі лауазымдарды атқарып, атышулы істерге қатысқан.

2011 жылы ол сол кездегі ең резонансты тергеулердің бірі — «Қорғас ісі» бойынша қамауға алынғандар туралы түсініктеме берді. Кейінірек, Қожамжаров Бас прокурор болып тұрған кезде Дүйсенов прокуратураға келді. Оның лауазымы Ұлттық бюро басшысының сыбайлас жемқорлыққа қарсы іс-қимыл жөніндегі орынбасарынан еліміздің Бас көлік прокурорына дейін өсті. Қожамжаров 2019 жылдың көктемінде сенатқа кеткеннен кейін Дүйсенов қызметінен айырылды.

Жазда қаржы полициясының бұрынғы басшысының серіктестеріне қарсы азаптау ісі бойынша тергеу басталғаны белгілі болды. Олар: Талғат Татубаев, Олеся Кексель және Бауыржан Мужиков.

Айта кетейік, жақында ғана Бас прокуратура Қайрат Қожамжаровтың өзіне қатысты сотқа дейінгі тергеу басталғанын ресми түрде растады.