Қазақстанның бұрынғы Бас көлік прокурорына іздеу жарияланды

Қазақстанның бұрынғы Бас көлік прокуроры Мақсат Дүйсенов үш күннен бері іздеуде жүр. Бұл туралы ақпарат құқықтық статистика комитетінің базасында жарияланды, деп хабарлайды Orda.kz.

Қылмыстық іс 29 тамызда Алматы қаласында тіркеліп, Алмалы аудандық полиция басқармасында тергеліп жатыр. Мақсат Дүйсенов бұрынғы Бас көлік прокуроры ретінде танымал, ол бұған дейін экс-сенатор, бұрынғы Бас прокурор және қаржылық полицияның жетекшісі Қайрат Қожамжаровпен бірге қызмет істеген. Ол кезде Дүйсенов Алматыдағы қаржы полициясының филиалына басшылық жасап, сыбайлас жемқорлыққа қарсы қызметте орынбасар болды, кейін Бас көлік прокуроры лауазымын иеленді.

Шілде айының басында  Orda.kz сайтында Қайрат Қожамжаров пен оның айналасындағы адамдар туралы материал шыққан еді. Қазіргі таңда Қожамжаровқа ең жақын адамдардың бірі саналатын сыбайлас жемқорлыққа қарсы ұлттық бюроның бұрынғы басшысы Талғат Татубаев пен Бас прокуратура жанындағы арнайы прокурорлар қызметінің экс-басшысы Олеся Кексель тергеуге алынды.

Сондай-ақ, қаржы полициясы мен Бас прокуратурада жоғары қызметтер атқарған Қожамжаровтың тағы бір серігі Талғат Махатов қамауда отыр. Ол бұған дейін сотталған және жақында тағы бір ұзақ мерзімге бас бостандығынан айырылды.