Ералы Тоғжановтың інісі қарамағындағыларға балағат сөздер айтқаны үшін жазаланбайды

Батыс Қазақстан облысындағы Бәйтерек ауданының әкімі Марат Тоғжановқа қатысты қарамағындағы қызметкерлерге балағат сөздер айтқаны жөніндегі тәртіптік іс жазаны қолдану мерзімінің өтуіне байланысты тоқтатылды. Бұл туралы Мемлекеттік қызмет істері агенттігі хабарлады.

Анықталғандай, Марат Тоғжанов қарамағындағыларды жарты сағат бойы балағат сөздермен ұрысқан жиын 3 сәуірде болған.

Агенттік оны «Қазақстан Республикасының мемлекеттік қызметі туралы» Заңының 45-бабына сәйкес тәртіптік жаза теріс қылық анықталған күннен бастап бір айдан кешіктірілмей қолданылады және теріс қылық жасалған күннен бастап алты айдан кешіктірілмей тағайындалады деп түсіндірді.

«М.Тоғжановтың еңбекке уақытша жарамсыздығы және теріс қылық анықталған кезде демалыста болған кезеңдерін ескере отырып, тәртіптік жауапкершілікке тартудың мерзімі өтіп кетті» деп хабарлады Мемлекеттік қызмет істері агенттігі.

Марат Тоғжановтың ағасы бұрынғы вице-премьер болған, қазіргі Ақтөбе облысының әкімі Ералы Тоғжанов.