Еліміздің мектептерінде жасанды интеллект қалай оқытылады?

Қазақстанда жасанды интеллекттің дамуын ескере отырып, мектеп пәндерінің атауы өзгертілді. Енді 1–4-сыныптардағы «Цифрлық сауаттылық» пәні «Цифрлық сауаттылық және жасанды интеллект», ал 5–11-сыныптардағы «Информатика» пәні «Информатика және жасанды интеллект» деп аталады. Бұл туралы Оқу-ағарту министрлігі мәлімдеді, деп хабарлайды Orda.kz.       

Ведомствоның мәліметінше, пән мазмұнына жасанды интеллектке қатысты жаңа бөлімдер мен 43 оқу мақсаты енгізілген. Негізгі міндет – оқушыларды бұл технологияны жай ғана қолдануға емес, оны саналы, тиімді әрі жауапкершілікпен пайдалануға үйрету.

1–4-сыныптарда оқушылар жасанды интеллектпен күнделікті өмірдегі қарапайым мысалдар арқылы танысады. Сонымен қатар цифрлық қауіпсіздік, жеке деректерді қорғау және цифрлық ортадағы жауапты мінез-құлық негіздерін меңгереді.

5–9-сыныптарда оқушылар оқу процесінде жасанды интеллект құралдарын тиімді пайдалануды, сұраныстарды дұрыс құрастыруды, алынған нәтижелерді сыни тұрғыдан бағалауды үйренеді. Сондай-ақ киберқауіпсіздік пен академиялық адалдық қағидаларын сақтауға дағдыланады.

10–11-сыныптарда негізгі назар жасанды интеллекттің жұмыс істеу қағидаттарын түсінуге және оны практикада қолдануға аударылады. Оқушылар машиналық оқыту негіздерін, нейрожелілерді, деректерді талдауды және қолданбалы криптографияны меңгереді.

Оқу-ағарту министрлігінің хабарлауынша, аталған пәндер бойынша жаңартылған оқу бағдарламалары өткен оқу жылында апробациядан сәтті өтіп, оң сараптамалық қорытынды алған. Қазіргі уақытта олар бекіту кезеңінде.

Сонымен қатар педагогтер үшін білім беру процесінде жасанды интеллектті тиімді әрі қауіпсіз қолдануға арналған әдістемелік ұсынымдар әзірленіп жатыр.

Бұған дейін үкімет жасанды интеллект жүйелерінің қазақ тілінде сапалы жұмыс істеу мәселесі қарады. Атап айтқанда, OpenAI компаниясымен бірлесіп жүзеге асырылып жатқан ChatGPT моделін қазақ тіліндегі сапалы контентпен толықтыру жобасының барысы талқыланды.

Оқи отырыңыз:

• ЖИ бақылаудан шығып, компанияларға шабуыл жасап жатыр
• АҚШ бақылаудан шыққан ЖИ-ді шұғыл өшіретін заң дайындап жатыр
• Үкімет жасанды интеллект жүйелерінің қазақ тілінде сапалы жұмыс істеуіне күш салады