Нұрайға қатысты «72 рет пышақ сұғар едім» деген пікір жазған адам анықталып, хаттама толтырылды

Нұрайға қатысты әлеуметтік желіде «72 рет пышақ тығар едім» деген пікір қалдырған @dkraken9 аккаунтының иесі анықталып, полицияға жеткізілді. Бұл туралы жәбірленушінің өкілі Аянхан Омаров мәлімдеді, деп хабарлайды Orda.kz.

Оның айтуынша, полиция аталған азаматқа қатысты Қазақстан Республикасы Әкімшілік құқық бұзушылық туралы кодексінің 456-2-бабы 3-бөлігі бойынша әкімшілік құқық бұзушылық туралы хаттама толтырған.

«Яғни, әлеуметтік желіде құқыққа қайшы контент жариялағаны үшін әкімшілік жауапкершілік мәселесі қаралады. Алдағы уақытта іс сотта қаралады»,— деді Аянхан Омаров. 

Оның мәліметінше, заңға сәйкес, құқық бұзушыға 20 АЕК (86 500 теңге) көлемінде айыппұл салынуы мүмкін. Адвокаттың айтуынша, бұл жағдай әлеуметтік желідегі пікірлер үшін де заң алдында жауапкершілік болуы мүмкін екенін көрсетеді.

«Аталған тұлғаның осыған ұқсас басқа да пікірлер жазғаны белгілі болды. Істің барысы туралы қосымша ақпарат беремін», — деді ол.

Бұған дейін Аянхан Омаров Нұрайға қатысты жазылған пікірге байланысты Шымкент қаласының полиция департаментіне арыз бергенін хабарлаған.

Оның сөзінше, TikTok қолданушысы Нұрайға жасалған шабуыл туралы ақпаратты біле тұра, «72 рет пышақ тығар едім» деген мазмұнда пікір қалдырған.

 Оқи отырыңыз:

• Димаштың түрік тіліндегі жаң әні iTunes хит-парадтарында бірінші орында тұр
• «Байден құсап құлап қалмасын»: Невададағы Трамптың әзілі мемге айналды