Велокурьер қағып, қашып кеткен: 12 жастағы қыздың жақ сүйегі сынып, тістері түсіп қалған

Ақтөбеде 12 жастағы қызды электровелосипед мінген ер адам қағып кетіп, ауыр жарақаттады. Оқиғадан кейін жүргізуші оқиға орнынан қашып кеткен, деп хабарлайды Orda.kz

«Диапазон» басылымының мәліметінше, жол-көлік оқиғасы 30 шілде күні Сазды ауданында болған. Зардап шеккен қыздың анасы Светлана Антомонованың айтуынша, қызы сол күні велосипедпен жалғыз серуендеуге шыққан. Біраз уақыттан кейін ол анасына бейнеқоңырау шалған.

«Бетінің бәрі қан. Алғашында мұрнынан қан кеткен шығар деп ойладым. Ал ол маған: "Анашым, көзілдірігімнің линзасын сызып алдым", – деді. Қатты шошып қалғандықтан, ауырғанын да сезбеген», – дейді анасы.

Кейін белгілі болғандай, 58 жастағы ер адам электровелосипедпен жоғары жылдамдықпен келіп, қызды қағып кеткен. Соққыдан кейін қыз өз велосипедіне соғылып, бетімен рөлге соғылған.

Салдарынан оның жақ сүйегі сынып, ерні жыртылған, алдыңғы үш тісі түсіп қалған, төртінші тісінің тек түбірі ғана қалған. Қызыл иегіне де тігіс салуға тура келген. Сол күні кешке оған шұғыл ота жасалды.

Анасының айтуынша, енді қызды ұзақ әрі қымбат ем күтіп тұр. Тұрақты тістерін қалпына келтіру мүмкін емес. Алдымен уақытша протез салып, қызыл иегін қалпына келтіріп, кейін тұрақты протездеу қажет болады. Жүргізуші оқиға орнынан кетіп қалған. Полицейлер оны келесі күні тауып, ұстаған. Қазір ол ешқайда кетпеу туралы қолхатпен босатылған.

Зардап шеккен қыздың анасының сөзінше, жүргізуші әзірге отбасымен байланысқа шықпаған және емдеу шығындарын өтеуді ұсынбаған. Қазіргі уақытта отбасы әлеуметтік желілер арқылы қыздың ем-домына қаражат жинауды бастаған.

Оқи отырыңыз:

Чемпиондар лигасы: «Түркістан Арена» тарихи матчқа дайын ба?

Бишімбаевтың анасы бұрынғы келінінен 25 млн теңге өндіріп алмақ