Атышулы ресейлік дәрігер Қазақстаннан қуылды

23 қыркүйек «Қордай авто» бақылау-өткізу бекетінде ресейлік пластикалық хирург Роман Алферов ҰҚК Шекара қызметінің қызметкерлеріне тапсырылды.

Алматы қалалық филиалының Көші-қон қызметі басқармасының хабарлауынша, ол Наурызбай аудандық сотының 2021 жылғы 27 шілдедегі шешімімен Қазақстан заңнамасын бұзғаны үшін елден шығарылған.

- Шешімді өз еркімен орындау үшін оған 10 күн уақыт берілді. Алайда шетелдік азамат әртүрлі жолдармен сот шешімін орындаудан жалтарып, бірнеше рет кассациялық шағым түсіріп, ауруханаға жатқызылды. Бұл ретте оның Қазақстанда болған кезінде бірнеше рет әкімшілік жауапкершілікке, бір рет қылмыстық жауапкершілікке тартылғанын хабарлаймыз, - деді Алматы қалалық полиция департаменті Көші-қон қызметі басқармасының бастығы Асхат Бүтіншінов.

Журналист Михаил Козачковтың айтуынша, Алферов жасаған операциялардан кейін екі науқас қайтыс болған. Бірақ ол жазадан құтылып үлгерген – бір рет марқұмның туыстарымен татуласуына байланысты, ал екінші жағдайда қылмыстық іс бойынша мерзімі өтіп кеткендіктен аман қалған.