Шымкентте спорт шеберін азаптап өлтірді деген алты адамның соты басталды

Шымкентте 40 жастағы күрестен спорт шебері Василий Колесниковты жол-көлік оқиғасынан кейін бір топ адам көлікке күштеп отырғызып, қала сыртындағы елді мекенге апарып өлтіріп тастаған іске қатысты сот процесі басталды, деп хабарлайды Orda.kz.

КТК арнасының мәліметінше, оқиға Шымкентте 20 қаңтарда болды, екі көлік соқтығысып, жүргізушілер жол үстінде жанжалдасқан. Артынша оқиға орнына бірнеше ер адам келіп, жаппай төбелес басталған. Жанжалдың бір бөлігі видеоға түсіп қалған екен. Төбелес кезінде ер адамдар Василий Колесниковты көлікке күштеп отырғызып, белгісіз бағытқа алып кеткен. Қорғау тарапы бұл оқиғаны жол апатынан кейінгі кездейсоқ жанжал емес, алдын ала ұйымдастырылған қастандық деп санайды.

Туыстар пен полиция Колесниковты бірнеше сағат бойы іздеген. Кейін оның денесі Шымкент маңынан табылды, тергеу мәліметінше, марқұмның денесінен азаптау белгілері анықталған.

Мемлекеттік айыптаушы Мұхтар Арыстановтың айтуынша, күдіктілер Колесниковқа аса қатыгездікпен бірнеше рет соққы жасаған.

«Олар қатты доғал затпен, сондай-ақ кесетін қасиеті бар өткір затпен бірнеше рет соққы жасаған. Денесіне келтірілген жарақаттардың өлімге әкелуі мүмкін екенін түсініп, оның өлімін қалап, қасақана өмірін қиған», – деді прокурор.

Іс бойынша алты адам сот алдына келді, тағы екі күдіктіге іздеу жарияланған. Іс бойынша сот талқылауы жалғасып жатыр.

Оқи отырыңыз:

Павлодарда ер адам тротуардың астындағы қайнаған суға құлап, күйіп қалды

Алматыда тұрғын үйдегі өрттен бір адам қаза тапты, тағы төртеуі ауруханада