Атырау облысында ер адам жүкті әйелін аяусыз соққыға жыққан

Атырау облысында 32 жастағы жүкті әйел күйеуінің соққысынан кейін ауруханаға түсті. Үш баланың анасы болған жағдайдан соң үйінен қашып шығуға мәжбүр болғанын айтып, күйеуін жауапқа тартуды талап етіп отыр, деп хабарлайды Orda.kz.

КТК арнасының мәліметінше, Акбөбек Оразбаеваның айтуынша, күйеуі оны шырт ұйқыда жатқан жерінде жұдырықпен ұрған. Әйелдің басы мен құлағы ауырғаны соншалық ол не болғанын түсінбей қалған.

«Мен ұйықтап жатыр едім, ол келіп жұдырығымен екі рет ұрды. Басым, құлағым – бәрі шыңылдап кетіп, Алла, Алла деп ұшып тұрдым жатқан жерімнен. Сол кезде кіші қызым оянып кетті, екі балам да ұйықтамаған екен. Артынан сұрап білгенімде қорыққаннан ұйықтап жатқан болыпты. Сол кезде ол мені аямауы мүмкін екенін түсіндім», – деді Оразбаева.

Анықталғандай, келіншектің күйеуі бұған дейін де қол көтерген, бірақ әр жолы кешірім беріп келіпті.  Үш баланың анасы қазір төртіншісіне аяғы ауыр болғандықтан күйеуі соққыға жыққанда болашақ сәбиінің өміріне алаңдағанын жеткізді. Қазір әйел Индер аудандық ауруханасында ем қабылдап жатыр. Дәрігерлер оған тыныштық сақтауды ұсынған.

«Ауруханаға түскен кезде басы мен жақ сүйегі тұсында көптеген жарақат болды. Сол аяғында да көгерген жерлері бар. Іші ауырғанын айтты. Қазір хирургия бөлімінде ем алып жатыр. Жағдайы тұрақты», – деді Индер аудандық ауруханасының хирургі Асланбек Ермұханов.

Әйел болған жағдай бойынша полицияға арыз жазған. Оның айтуынша, күйеуі көп ұзамай босатылған. Жәбірленуші қайтадан шу көтергеннен кейін ғана ер адам қайта ұсталған. Полиция әзірге оқиғаға қатысты ресми түсініктеме берген жоқ. Құқық қорғау органдары істің мән-жайын анықтап жатыр.

Оқи отырыңыз:

Павлодарда ер адам тротуардың астындағы қайнаған суға құлап, күйіп қалды

Леңгірде бетперде киген адамдар үйге кіріп, әйелді бірнеше сағат бойы ұстаған