Алматы облысында екі баланың анасы көлік қағып қаза тапты

Алматы облысының Бекболат ауылында жол-көлік оқиғасынан екі қыздың анасы қаза тапты. Әйел электр велосипедімен жұмысқа бара жатқан, деп хабарлайды Orda.kz.

Марқұмның үлкен қызы Аружанның айтуынша, анасы Бекболат ауылындағы Первомай ауруханасына жұмысқа бара жатқан кезде қарсы бағытқа Hyundai көлігі шығып кеткен.

Туыстарының сөзінше, көлік жүргізушісі тоқтамай, әйелді шамамен 3-4 метрге сүйреп кеткен. Салдарынан әйел ауыр бас-ми жарақатын алып, III дәрежелі комаға түскен. Алайда дәрігерлер оның өмірін сақтап қала алмады.

Оқиға кезінде көлік ішінде сәби болғанын куәгерлер айтқан. Туыстары жүргізуші сәбиге алаңдап, жолға назар аудармай қалуы мүмкін деп болжап отыр.

Қыздардың әпкесі жол апаты болған жерге полиция қызметкерлері оқиға схемасын жасап жатқан кезде барған. Туыстарының айтуынша, схема жасау барысында қателіктер жіберілген болуы мүмкін. Бұл жайт видеода көрсетілген.

Марқұмның жақындарының айтуынша, Hyundai жүргізушісі қайтыс болған әйелдің туыстарымен осы уақытқа дейін байланыспаған.

Артында екі кішкентай қызы қалды. Қазір олардың туыстары істің жан-жақты әрі объективті тергелуін күтеді.

Оқиғаға қатысты полицияның ресми түсініктемесі әзірге жарияланған жоқ.

Оқи отырыңыз: 

• Бірі қабірде, бірі мүгедек: Екі адамды қаққан 21 жастағы жүргізушіге апелляция сот шешімі қандай?
• Атырау МӨЗ-де өрт шықты