Алматыдағы электр өшуіне Канье Уэсттің қатысы жоқ – Энергетика министрлігі

Алматыдағы ауқымды электр өшуінен кейін желіде Канье Уэсттің концертіне арналған алып сфера қаланың энергожүйесіне салмақ түсірді деген әзіл-қалжың тараған еді. Энергетика министрі Ерлан Ақкенженов әншінің концерттік конструкцияның блэкаутқа еш қатысы жоқ екенін айтты, деп хабарлайды Orda.kz.

14 тамызда Алматыда ауқымды электр қуаты өшіп, қаланың басым бөлігі жарықсыз қалды. Сол күні америкалық танымал орындаушы Канье Уэсттің концерті өтуі тиіс болған, алайда шара келесі күнге шегерілді. Осыдан кейін алматылықтар арасында электр қуатының өшуіне концерт кезінде қолданылған алып шар тәрізді сахналық құрылғы себеп болуы мүмкін деген әзіл тарады. Кейбіреулер оның электр энергиясын көп тұтынуы салдарынан желіге шамадан тыс жүктеме түсуі мүмкін деген болжам айтты. Бұл ақпаратқа Қазақстанның Энергетика министрі Ерлан Ақкенженов түсініктеме берді.

«Атырау мұнай өңдеу зауыты 90 МВт электр энергиясын тұтынады. Ал бұл жерде 600 МВт көлемінде өшіру болды. Сондықтан электр энергиясын қанша тұтынатыны белгісіз – 5, 10 немесе 20 МВт болсын, сфераның энергожүйенің тұрақтылығына әсері жоқ. Канье Уэсттің сферасының әсерін толықтай жоққа шығарамын», – деді Ақкенженов.

Министр электр қуатының өшуіне сырттан жасалған қасақана араласу да себеп болды деген болжамды жоққа шығарды. Оның айтуынша, бұл – арнайы комиссия анықтауы тиіс себептері бар апаттық жағдай.

Оқи отырыңыз:

Атырау облысында ер адам жүкті әйелін аяусыз соққыға жыққан

Шымкентте спорт шеберін азаптап өлтірді деген алты адамның соты басталды