Астанада марқұм өрт сөндіруші Асқар Забикулиннің құрметіне көше ашылды

Астанада марқұм  өрт сөндіруші Асқар Забикулиннің құрметіне көше ашылды.

Төтенше жағдайлар министрлігі Құтқарушылар күні қарсаңында Астанадағы Үркер шағын ауданында өрт сөндіруші Асқар Серікұлы Забикулин атындағы көшенің ашылғанын хабарлады.

«Ержүрек өрт сөндірушінің есімін мәңгілікке қалдыру мақсатында Астана көшелерінің біріне Асқар Забикулин есімі берілді, ескерткіш тақта орнатылды. Көшенің ашылуына Асқар Зәбикулиннің туыстары, әйелі мен балалары, күзет органдары қатысты. Шара барысында Астана ТЖД басшылығы мен жеке құрамы, Асқардың туыстары, ТЖД қызметкерлері мен ардагерлері ағаш отырғызды» деп хабарлады ведомство.

Астана қаласы ТЖД Өрт сөндіру және авариялық-құтқару жұмыстары қызметі жедел кезекшісінің көмекшісі Асқар Забикулин өрт сөндіру кезінде үш адамды аман алып қалып, өзі  алған ауыр жарақатынан 20 қараша күні ауруханада қайтыс болды.

Еске сала кетейік, 16 қарашада астаналық өрт сөндірушілер өртеніп жатқан пәтерден бес адамды аман алып қалған болатын. Кейін Төтенше жағдайлар министрлігі хабарлағандай, өрт сөндіру кезінде өрт сөндірушілердің өздері жарақат алып, денелері мен беттері күйіп қалған. Асқар Забикулиннің денесінің 80 пайызын күйік шалған.