LRT тамыздан бастап жаңа тарифке көшеді

1 тамыздан бастап Астанадағы жеңіл рельсті көліктеріне (LRT) жаңа тариф енгізіледі. Бұл туралы City Transportation Systems компаниясы мәлімдеді, деп хабарлайды Orda.kz.       

Компания мәліметінше, Tarlan Astana жеңіл рельсті көлік желісінде жолаушыларға қолайлы болу үшін кеңейтілген тариф жүйесі іске қосылады.

Бір реттік жолақы бұрынғыдай 200 теңге болып қала береді. Ал 1 тамыздан бастап келесі жол жүру тарифтері қолданысқа енгізіледі:

Уақыттық абонементтер:

• 1 күндік – 500 теңге
• 3 күндік – 1 500 теңге
• 5 күндік – 2 500 теңге
• 10 күндік – 4 000 теңге
• 15 күндік – 5 000 теңге
• 1 айлық – 7 500 теңге
• 3 айлық – 20 000 теңге

Белгіленген сапар саны бойынша тарифтер келесідей: 5 сапар – 900 теңге,10 сапар – 1 800 теңге,
20 сапар – 3 500 теңге, 30 сапар – 5 000 теңге.

CTS компаниясы тарифтерді пайдалану шарттарын түсіндірді. Егер тариф осы айдың 15-іне дейін (қоса алғанда) сатып алынса, ол сол айдың соңына дейін жарамды болады. Ал 15-інен кейін сатып алынған жағдайда тариф келесі айдың 1-інен бастап күшіне енеді.

Тариф сатып алынған күнтізбелік ай ішінде, яғни айдың 1-інен 30-ына (немесе 31-іне) дейін жарамды.

Күндік жол жүру билеттері мен сапар пакеттері алғашқы рет валидатордан өткізілген сәттен бастап іске қосылады және сол күннің соңына дейін (сағат 00:00-ге дейін) немесе сатып алынған сапар саны толық пайдаланылғанға дейін жарамды болады.

Тарифтерді жеңіл рельсті көлік бекеттеріндегі кассалардан сатып алуға болады. Олар Tarlan Astana жүйесінің көлік картасына жүктеледі. Көлік картасындағы қалдықты кассада немесе станциядағы терминал арқылы тексеруге болады.

Көлік картасы жоғалған жағдайда, белсендірілген (қолданыстағы) тарифтер қалпына келтірілмейді және басқа картаға ауыстырылмайды.

Айта кетейік, бұл тариф тек Tarlan Astana жеңіл рельсті көлік жүйесінде ғана жарамды. Қазіргі уақытта оларды қала автобустарымен біріктіру жұмыстары жүргізіліп жатыр.

Оқи отырыңыз:

• «Tarlan Astana» болып өзгертілген LRT–да өрт шықты
• «Тарлан – Астана»: LRT жүйесінің жаңа атауын мәслихат қолдады