Елімізде 450 мың оқушыға 23 миллиард теңге қаржылай көмек қарастырылған

1 тамыздан бастап Қазақстанда балаларды жаңа оқу жылына дайындау үшін отбасыларға көмек көрсету бойынша жыл сайынғы науқан басталады, деп хабарлайды Orda.kz.        

Оқу-ағарту министрлігі мәліметінше, «Жалпы білім» қоры аясында әлеуметтік осал санаттағы шамамен 450 мың оқушыға қолдау көрсетіледі.

Мектеп формасын, аяқ киім мен кеңсе тауарларын сатып алуға жергілікті бюджеттен шамамен 23 миллиард теңге қарастырылған. Науқан 2026 жылғы 30 қыркүйекке дейін жалғасады.

Биыл бір балаға берілетін ең төменгі көмек мөлшері 50 851 теңге болды. Бұл өткен жылмен салыстырғанда 10 пайыз жоғары. Кейбір өңірлерде төлем көлемі бұдан да көп болуы мүмкін — бәрі жергілікті бюджет мүмкіндігіне байланысты.

Көмек келесі санаттағы балаларға беріледі: жетім балалар және ата-анасының қамқорлығынсыз қалғандар, аз қамтылған отбасылардың балалары,  атаулы әлеуметтік көмек алатын отбасы балалары, қиын өмірлік жағдайға тап болған балалар.

Төлемді алу үшін ата-аналар немесе заңды өкілдер баланың оқитын білім беру ұйымына барып, қажетті құжаттарды тапсыруы тиіс.

Оқу-ағарту министрлігінің мәліметінше, бөлінген қаражат жаңа оқу жылы қарсаңында мектеп формасын, аяқ киім және қажетті оқу құралдарын сатып алуға жұмсалады.

Оқи отырыңыз:

• 10 тамыз – Абай күні: Ақын бір қыста 12 қылмыстық іс бойынша тексерілгенін білген бе едіңіз?
• Сайлау кезіндегі дипфейк: Саяси партия өкілдерінің бейнелері заңсыз пайдаланылып жатыр