АҚШ-та Трамптың портреті бейнеленген паспорттар беріле бастады

АҚШ Мемлекеттік департаменті ел тәуелсіздігінің 250 жылдығына орай шығарылған шектеулі сериядағы Patriot Passport («Патриот паспорты») құжаттарын бере бастады, деп хабарлайды Orda.kz.       

Бұл құжаттың ерекшелігі – ішкі мұқабасына АҚШ президенті Дональд Трамптың портреті орналастырылған. Бұл – АҚШ тарихында қызметтегі президенттің бейнесі ресми паспортқа алғаш рет енгізілген жағдай.

Мемлекеттік департаменттің мәліметінше, жаңа дизайндағы паспорттарда алдыңғы, артқы және ішкі мұқабалар жаңартылған. Сонымен қатар, олар кәдімгі америкалық паспорттардағы барлық заманауи қауіпсіздік элементтерімен жабдықталған және халықаралық деңгейде толық заңды күші бар жол жүру құжаты болып саналады.

Алғашында бұл паспорттарды тек Вашингтонда рәсімдеуге болатын. Алайда жоғары сұранысқа байланысты бағдарлама кеңейтіліп, енді Чикаго, Даллас, Детройт, Нью-Йорк, Лос-Анджелес және басқа да қалалардағы Мемлекеттік департаменттің паспорт орталықтарында қолжетімді болады. Тамыз айының ішінде жобаға елдегі барлық өңірлік бөлімшелер кезең-кезеңімен қосылады.

Ведомство бастапқы жоспардан бөлек, қосымша 250 мың дана Patriot Passport шығарылатынын хабарлады.

Паспорттың ерекшеліктеріне тоқталсақ, ішкі мұқабасында Дональд Трамптың портреті орналасқан. 
Онда АҚШ Тәуелсіздік декларациясының мәтіні және алтын түспен бедерленген Трамптың қолтаңбасы бар және құжаттың заңдық күші кәдімгі АҚШ халықаралық паспортымен бірдей.

Бағасы өзгермеген – азаматтар оны стандартты мемлекеттік баж салығы бойынша рәсімдейді.
Бұл бастама АҚШ-тың America250 мерейтойлық бағдарламасының бір бөлігі саналады. Осы жоба аясында Трамптың бейнесі ұлттық парктердің рұқсатнамаларына, естелік монеталарға енгізіліп жатыр, ал оның қолтаңбасы жаңа шығарылатын 100 долларлық банкноттарға да орналастырылмақ.

Оқи отырыңыз:

• Қытайдың «мұнай жұмбағы»: Тағы да жұмсақ күш танытпақшы ма?
• Трамп ХАМАС-тың толық қарусыздану жөніндегі «тарихи» келісім жасалғанын мәлімдеді