Алматыда қаңтар құрбандарына арналған мемориал ашылды 

Алматыда қаңтар оқиғасы құрбандарына арналған мемориал ашылды.

 Ескерткіш қала әкімдігі жанындағы алаңда, Сәтбаев көшесінің оңтүстігінде және Назарбаев даңғылының батысында бой көтерді.

 Ескерткіштің ашылуында ел президенті Қасым-Жомарт Тоқаев «артында арандатушылар тұрған лаңкестер билікті басып алуға және мемлекетіміздің іргесін шайқауға әрекеттеніп, бейбiт митингiлердi пайдаланғанын» айтты.

20 қазанда Қазақстандағы құқық қорғаушылар АҚШ, Еуроодақ, Ұлыбритания және Канада елдерін тәуелсіз халықаралық тергеу жүргізу және барлық кінәлілерді жауапқа тарту үшін Қазақстан билігіне қысым көрсетуге шақырғаны белгілі болды.

 Айта кетсек, 10 ай өтсе де қаңтар оқиғасының тергеуі жөнінде сұрақ көп.  Сондай-ақ, 19 қазанда ҚР Бас прокурорының орынбасары Әсет Шындалиевтің рақымшылыққа құқық қорғау органдарының бір ғана өкілі түседі деп сендіргенін қосамыз.

 Қаза болғандардың нақты саны оқиғалардан сегіз ай өткеннен кейін тамыз айында ғана ресми түрде жарияланды.

 Маусым айында Қазақстан президенті Қасым-Жомарт Тоқаев қаңтарда елге шабуыл жасаған «20 мың лаңкес» туралы айта келіп, «бұл бүкіл елге қатысты» деді.

 16 қыркүйек күні қаңтар оқиғасы мен жүріп жатқан сот процестерін белсенді жариялап жүрген журналист Динара Егеубаева полиция бөлімшесіне жауап алуға шақырылды.  Ол бұл оқиғаның өзінің журналистік қызметіне кедергі болғанын айтты.