Ақтауда бесінші қабаттан құлап кеткен қыз аман қалды

18 жастағы қыз аурухананың жедел жәрдем бөліміне жеткізілді. Полиция қылмыстық іс қозғады, деп хабарлайды Orda.kz порталы Lada.kz-ке сілтей отырып.

Қыз достарымен бесінші қабаттағы пәтерде болған. Сондай-ақ ол құлағаннан кейін өздігінен тұруға тырысып, дәрігерлердің көмегінен бас тартқан.

«Науқастың жағдайы ауыр және ол әзірге тыныс алу аппаратында. Диагнозы: аралас жарақат, бас миының жабық жарақаты, бас миының контузиясы, жабық кеуде жарақаты, оң жақ қабырғасының жабық сынығы, оң жақ гемопневмоторакс, іштің жабық жарақаты, бауырдың жыртылуы, оң жақ мықынының жабық сынығы, оң қолдың жабық сынығы» деп хабарлады Маңғыстау облыстық ауруханасының баспасөз қызметі. 

Оқиға негізінде Ақтау қалалық полиция бөлімі «өзін-өзі өлтіруге итермелеу» бабы бойынша қылмыстық іс қозғады.