Атыраудағы әуежайда шетелдік қайтыс болды: Полиция мән-жайды мәлімдеді

«Аэрофлот» әуе компаниясының ұшағындағы жолаушы Атырау әуежайына мәжбүрлі түрде қонғаннан кейін қайтыс болды. Оқиғаның мән-жайын Көліктегі полиция департаментінің баспасөз қызметі мәлімдеді, деп хабарлайды Orda.kz.       

Жолаушының қайтыс болғаны туралы ақпарат 25 тамызда Атырау станциясындағы Көліктегі полиция бөлімінде тіркелген.

Көліктегі полиция департаментінің мәліметінше, қазіргі уақытта оқиғаның барлық мән-жайын анықтауға бағытталған бастапқы тексеру шаралары жүргізіліп жатыр.

«Қазіргі уақытта болған жағдайдың барлық мән-жайын анықтауға бағытталған бастапқы тексеру шараларының кешені жүргізілуде», деп хабарлады полиция. 

Алдын ала мәлімет бойынша, жолаушының өліміне жедел жүрек жеткіліксіздігі себеп болған.

Полиция әзірге оқиғаның өзге де егжей-тегжейін жариялаған жоқ. Ведомствоның түсіндіруінше, басқа ақпарат Қазақстан Республикасы Қылмыстық-процестік кодексінің 201-бабына сәйкес жария етуге жатпайды.

Атырау әуежайы баспасөз қызметі қажетті рәсімдер аяқталғаннан кейін әуе кемесі Атырау – Екатеринбург бағыты бойынша ұшуын жалғастырғанын хабарлады.

«Ұшақ қонарда әуежайдың тиісті қызметтеріне ақпарат берілді. Медициналық бригада әуе кемесін перронда күтіп алды. Жолаушыны тексергеннен кейін медицина қызметкерлері оның қайтыс болғанын анықтады. Жолаушының денесі ұшақтан түсіріліп, одан әрі қажетті рәсімдерді жүргізу үшін тиісті қызметтерге тапсырылды. Ер адаммен бірге ұшып келе жатқан жолаушы әйел де рейстен түсірілді», – деді әуежай өкілдері. 

Бұған дейін әлеуметтік желілерде оқиға туралы ақпарат тараған болатын. Онда Атырау халықаралық әуежайында Түркиядан Ресейге ұшып бара жатқан «Аэрофлот» жолаушысының қайтыс болғаны хабарланған.

Тараған мәліметке сәйкес, ұшақ Анталья – Екатеринбург бағыты бойынша рейс орындаған. Алдын ала ақпарат бойынша, ұшу кезінде 41 жастағы жолаушының кенеттен жағдайы нашарлаған.

Ер адам Түркиядағы демалыстан кейін үйіне қайтып бара жатқан. Денсаулығының күрт нашарлауына байланысты экипаж бағытты өзгертіп, Атырауға мәжбүрлі түрде қонған. Алайда ұшақ қонғаннан кейін жолаушы қайтыс болған.

Жоспардан тыс қонуға байланысты рейс Екатеринбургке бастапқы кесте бойынша жете алмаған. БАҚ мәліметінше, рейстің жалпы кешігуі 2 сағат 25 минут болған.

Оқи отырыңыз:

• Ұлдана Мырзуанның қазасы: Адвокат істі прокурорға қайтаруды сұрады
• «Ердоған қайтыс болды» деп материал жариялағаны түрік журналистері ұсталды