Алматы облысында 17 адам 800-ден астам көлікті заңсыз тіркеген

Алматы облысында ұйымдасқан қылмыстық топтың 17 мүшесі 800-ден астам көлікті заңсыз тіркеуге қойғаны үшін сотталды, деп хабарлайды Orda.kz.

Сот олардың әрқайсысына қылмыстағы рөлі мен қатысу деңгейіне қарай 2 жылдан 11 жылға дейін бас бостандығынан айыру жазасын тағайындады.

Тергеу барысында Қаржылық мониторинг агенттігінің Алматы облысы бойынша департаменті қылмыстық топтың екі жыл бойы белгіленген талаптарды айналып өтіп, автокөліктерді заңсыз тіркеумен айналысқанын анықтаған.

Алдымен қылмыстық схемаға қатысушылар техникалық регламент талаптарын бұза отырып Қазақстанға әкелінген 642 жүк көлігін заңсыз тіркеген.

Кейін схема жеңіл көліктерге қатысты жалғасқан. Қатысушылар «қосар көліктерді тірілту» деп аталатын тәсілді қолданған. Яғни заңсыз әкелінген көліктерге Қазақстанда бұрын тіркеліп, кейін есептен шығарылған басқа көліктердің VIN-кодтары берілген. Осылайша тағы 209 көлік тіркелген.

Заңсыз схемаға полиция қызметкерлері, мамандандырылған ХҚКО мамандары және жеке нотариустар қатысқан. Олар ақпараттық жүйелерге жалған мәліметтер енгізіп, жалған тұлғалардың атына сенімхат рәсімдеуді қамтамасыз еткен.

Мемлекетке төленбеген тіркеу алымы 5,4 млрд теңгені, ал утиль алымы 1,2 млрд теңге болған. Жалпы сома 6,6 млрд теңгеден асты.

Тергеу кезінде көлік иелері алғашқы тіркеу алымдарын өз еркімен төлеп, мемлекетке 1 млрд теңгеден астам қаражат қайтарылды.

Сонымен қатар сот үкімімен сотталғандардың қылмыстық табысқа сатып алған бес автокөлігі мемлекет кірісіне тәркіленді.

Бұрынғы төрт полиция қызметкері арнайы атақтарынан айырылды. Ал іске қатысы бар нотариустарға сот нотариаттық қызметпен айналысуға тыйым салды.

Сот үкімі әзірге заңды күшіне енген жоқ.

Оқи отырыңыз: 

Ат байлаған арқанға ілініп қаза тапқан қызға қатысты оқиғаның жай-жапсары белгілі болды

Пашинян: «ҰҚШҰ бітімгерлері Арменияға кірмейді»