«Бес айлық күшік еді»: 11 жастағы баланың құлағын шайнап тастаған иттердің иесі сотта жауап берді

Жалпақсайда 11 жастағы балаға иттер шабуыл жасап,құлағын шайнап, денсаулығына ауыр зиян келтірген.  Бүгін сотта иттердің иесі балаға үлкен иттер емес, бес айлық күшіктер шабуыл жасағанын айтып, олардың мұндай ауыр зиян келтіруі мүмкін екенін жоққа шығарды, деп хабарлайды Orda.kz. 

Қарасай аудандық сотында Жалпақсай ауылында оқушыға иттердің шабуыл жасауына қатысты қылмыстық істі қарау жалғасты. Сотта иттердің иесі Алмас Халиев пен шабуыл кезінде балаға көмектескен куәгерден жауап алынды.

Халиев өз кінәсін ішінара мойындайтынын, алайда айыптауда көрсетілген бірқатар мән-жаймен келіспейтінін айтты. Сотталушы балаға шабуыл жасаған иттердің сипаттамасына қатысты эмоция білдіріп, баланың алған жарақаттарының сипаты мен оқиғаның мән-жайларына жеке тоқталды.

«Бұл қазір айтылып жүргендей, ересек ірі иттер емес, шамамен бес айлық үш күшік еді. Олардың баланы тістеп, құлағын жарақаттауы мүмкін болғанын жоққа шығармаймын. Бірақ баланың денсаулығына келген барлық ауыр зардап иттердің шабуылынан болды дегенмен келіспеймін. Миының шайқалуы мен басындағы кейбір жарақаттар құлағаннан болуы мүмкін деп есептеймін. Сонымен қатар, балалар бөгде адамдардың кіруіне тыйым салынған аумақта болған, сондықтан олардың ол жерге не үшін барғанын түсінбеймін», — деді Халиев сотта.  

Осылайша, сотталушы өз кінәсін ішінара мойындайды, алайда оқиғаның мән-жайымен, баланың кейбір жарақтарының сипатымен және олардың денсаулығына тигізген зардаптарымен келіспейді.

Еске сала кетейік, шабуыл балалар футбол ойнап жүрген спорт кешенінің аумағында болған. Оның жанында алкоголь және есірткіге тәуелділіктен емделетін адамдарға арналған оңалту орталығы орналасқан. Сотта айтылған мәліметке сәйкес, иттер осы орталық аумағында болған. Спорт кешені мен оңалту орталығы аумағын бөліп тұрған қақпа болған, алайда іс материалдарында оның бүлінгені, содан кейін иттердің сыртқа шығып кеткені айтылған.

Халиев сотта иттердің адамға үйренгенін және оңалту орталығында ем алып жатқан адамдармен қарым-қатынас жасау үшін ұсталғанын айтты. Алайда иттердің көлемі мен мінез-құлқына қатысты оның нұсқасы шабуылды өз көзімен көріп, балаға көмек көрсеткен куәгердің жауабымен сәйкес келмейді.

Куәгер сот отырысына онлайн қосылды. Оның айтуынша, балаға үш ірі ит шабуылдаған. Бала қан-жоса болып жерде жатқан және көмек сұраған, сол кезде ер адам оны құтқару үшін араласуға мәжбүр болған.

«Мен баланың қан-жоса болып жерде жатқанын көрдім, оған үш үлкен ит шабуылдап жатты. Ол «Аға, көмектесіңіз!» деп айқайлады. Баланы тез арада құтқару керек екенін түсіндім, сондықтан көліктен кішкентай пышақ алып, иттердің бірін жарақаттап, оны баладан алыстатуға тырыстым. Иттер өте агрессивті болды және балаға шабуылын тоқтатпады, сондықтан осындай әрекет жасауға тура келді», — деді куәгер сотта. 

Сот отырысынан кейін зардап шеккен баланың анасы Бурмистрова Екатерина  Orda.kz-ке  баланың әлі де денсаулығы бір қалыпқа келмегенін айтты. 

Әйелдің айтуынша, шабуылдан бері бір жыл өтсе де, бала әлі толық қалпына келмеген. Оған әлі де психологиялық көмек қажет болғандықтан, ол уақытша мектепке бармайды.

«Шабуылдан бері бір жыл өтті, бірақ бала әлі толық қалпына келген жоқ. Қазір оған қайтадан психологиялық көмек қажет, сондықтан уақытша мектепке бармайды. Шабуылдан кейін құлағында мәселе қалды, ауырады әрі нашар естиді, біз дәрігерге әлі барып жүрміз. Сонымен қатар көру қабілетінде де күрделі мәселе бар — бір көзі қазір өте нашар көреді, сондықтан офтальмологтың бақылауындамыз», — деді баланың анасы. 

Сонымен қатар, 11 жастағы зардап шекке Максим Головачевтің анасы сотта күдікті Халиевтің айтқанымен келіспейтінін айтты. 

«Ол сотта ұялмастан баламды талап тастаған иттерін 5 айлық күшік дейді. Қалайшы олар кәдімгі тістері шыққан 50 см биік алабай иттер екенін сол кезде жалғыз мен емес елдің бәрі көрді»,– деді келіншек. 

Іс ҚР Қылмыстық кодекстің 114-бабы 3-бөлігі бойынша қаралып жатыр. Жәбірленуші тараптың адвокаты Арман Шәріповтің айтуынша, олардың қолында оқиғаға қатысты барлық қажетті дәлелдер бар. Атап айтқанда, фото және бейнежазбалар арқылы иттердің қандай болғанын, олардың көлемін және балаға қалай шабуыл жасағанын сотта көрсетуге болады.

«Бүгін сотталушы иттердің ірі болғанын мойындамай, олардың алабай сияқты үлкен ит емес, кішкентай күшіктер болғанын айтты. Ол иттердің баланың құлағын тістегенін мойындайды, бірақ денсаулығына үлкен зиян келтірмеді деп отыр. Алайда біздің қолымызда болған оқиғаны толық көрсететін фото және бейнематериалдар бар. Бұл материалдардан иттердің балаға қалай шабуыл жасағанын және олардың нақты көлемін анық көруге болады. Егер сотталушының кінәсі дәлелденсе, оған бір жылға дейін бас бостандығынан айыру жазасы тағайындалуы мүмкін», — деді адвокаты Шәріпов. 

Еске салайық, оқиға 2025 жылғы 30 маусымда Алматы облысы Қарасай ауданындағы Жалпақсай ауылында болған. Үш ит оқушыға шабуыл жасаған. Бала көп жерінен тістеліп, оның ішінде құлағынан жарақат алған. Баланы құтқаруға келген ер адам иттердің шабуылын тоқтату үшін оларды өлтіруге мәжбүр болған.

Сот отырысы жалғасып жатыр.

Оқи отырыңыз:

• Ат байлаған арқанға ілініп қаза тапқан қызға қатысты оқиғаның жай-жапсары белгілі болды
• «Қызымды бірден тани алмадым»: Фельдшер Ұлдананың анасы сотта көз жасына ерік берді