Ұлдана Мырзуанның қазасы: Адвокат істі прокурорға қайтаруды сұрады

Астананың мамандандырылған ауданаралық сотында өткен кезекті сот отырысында сотталушы Сәуле Жұбаниязованың адвокаты сөз сөйледі. Қорғаушы құрылыс-техникалық сараптаманың қорытындысына сүйене отырып, қылмыстық істі прокурорға қайтару туралы өтінішхат түсірді, деп хабарлайды Orda.kz.        

Адвокаттың айтуынша, сарапшы ғимарат құрылысында бірқатар елеулі ақау болғанын анықтаған.

«Сарапшы жобаға сәйкес қарастырылған монолитті арматураланған белдеу болмағанын, арматуралық торлардың жоқтығын немесе тиісті деңгейде орнатылмағанын, қаптама қабатының беріктіг талаптары бұзылғанын, кірпіш қалау жіктерінің сапасыздығын, жіктердің бос қалғанын, қалау қабаттары арасында саңылаулар болғанын, байлау тәртібінің бұзылғанын және тік бағыттан ауытқулар бар екенін анықтады. Сарапшының 2017 жылдың өзінде қабырғалардың түйісетін тұстарында жарықтар мен қаптама қабатының жекелеген жерлерде бұзылғанын тіркегені туралы қорытындысы ерекше маңызды», – деді қорғаушы. 

Бұған дейін Астанада өтіп жатқан фельдшер Ұлдана Мырзуанның анасы сот алдында жауап беріп, қызы соншалықты ауыр хәлде жатқандықтан жансақтау бөлмесінде оны тани да алмағанын айтқан болатын.

Адвокаттың сөзінше, ғимараттағы қауіпті үдеріс сотталушы мүлік иелері бірлестігінің (МИБ) төрағасы болып тағайындалғанға дейін бірнеше жыл бойы қалыптасқан.

Осыған байланысты қорғаушы істі прокурорға қайтаруды сұрап, тиісті өтінішхат берді.

Тақырыпқа қатысты ұсынамыз:

• Фельдшер Ұлдана Мырзуанның өлімі: Қорғау тарабы судьяға қарсылық білдірді
• «Қызымды бірден тани алмадым»: Фельдшер Ұлдананың анасы сотта көз жасына ерік берді
• Астанада фельдшер Ұлдана Мырзуанның өліміне қатысты сот отырысы басталды