Трамп түн жарымда қызметкеріне қоңырау шалып, Тоқаевқа сәлем жолдаған

Қазақстан президентінің баспасөз пулындағы журналист Әділ Балтабаев АҚШ президенті Дональд Трамптың өз қарамағындағы америкалық конгрессменге телефон соғып, Қасым-Жомарт Тоқаевқа сәлем жолдағанын айтты, деп хабарлайды Orda.kz.       

Бұған дейін Қасым-Жомарт Тоқаев АҚШ Өкілдер палатасының Бюджет және салық комитетінің төрағасы Джейсон Смитпен, сондай-ақ Конгресс мүшелері Грег Мерфи, Кэрол Миллер, Ронни Джексон, Уэсли Белл және Эдвард Кейспен кездескені хабарланған болатын.

Кездесуге бұқаралық ақпарат құралдары өкілі ретінде қатысқан Әділ Балтабаев Дональд Трамптың қоңырауы туралы Джейсон Смиттің сөзін келтірді. Оның айтуынша, Ақ үй басшысы оған түнгі сағат екіде қоңырау шалып, бірнеше сағаттан кейін Қазақстан президентімен кездесетінін білген.

«Бүгін түнгі сағат екіде маған президент Дональд Трамп қоңырау шалды. Мен оған бірнеше сағаттан кейін Сізбен кездесетінімді айттым. Ол Сізге өзінің ең жылы тілектерін жеткізуді өтінді және араларыңызда қалыптасқан сенімді әрі сындарлы қарым-қатынас үшін алғысын білдірді», – деді Джейсон Смит. 

Конгрессменнің сөзін журналист Әділ Балтабаев жеткізді. Сондай-ақ Дональд Трамп Қасым-Жомарт Тоқаевты «Үлкен жиырмалық» (G20) саммитінде Майамиде күтетінін айтқан.

Трамптың Қазақстан президентіне жеке сәлем жолдауы екі ел арасындағы жоғары деңгейдегі байланыстардың жалғасып жатқанын көрсетеді.

Еске салсақ, бұған дейін Қазақстан Сыртқы істер министрлігі президент Қасым-Жомарт Тоқаевтың 2026 жылғы желтоқсанда Майами қаласында өтетін G20 саммитіне қатысу жоспарын растаған болатын. 

Қазақстан «Үлкен жиырмалыққа» мүше емес. Алайда АҚШ елімізді саммитке шақырылатын мемлекеттер тізіміне ресми түрде енгізген.

Оқи отырыңыз:

• Қазақстан президенті АҚШ-та өтетін G20 саммитіне қатысады
• Тоқаев Құрылтайдың тұңғыш сессиясын өткізуге қол қойды