Тоқаев: Қазақстан оқулықтарында 700-ден астам қате бар

Қасым-Жомарт Тоқаев педагогтердің тамыз конференциясында мектептегі білім беру жүйесіне қатысты бірнеше мәселені көтерді. Ол оқулықтардың сапасы мен әдебиет мазмұнынан бастап, Назарбаев Зияткерлік мектептері мен жекеменшік мектептердегі оқу мерзіміне дейін сөз қозғады, деп хабарлайды Orda.kz.

Мектеп оқулықтарында 700-ден астам қате анықталған

Мемлекет басшысы мектеп оқулықтары сапасын сынға алып, тарихи деректері шындыққа сәйкес келмейтін материалдарды қайта қарауды талап етті. Президенттің айтуынша, оқулықтардан 700-ден астам елеулі қате анықталған.

«Ойланып көріңіздерші, оқулықтарда 700-ден астам қате бар!» – деді Қасым-Жомарт Тоқаев.

Президент сондай-ақ оқушыларға тарихи деректілігі күмән тудыратын кейіпкерлер мен ерліктер туралы айтылатын жағдайларға назар аударды. Оның пікірінше, патриоттық тәрбие жалған немесе бұрмаланған мәліметтерге негізделмеуі керек. Себебі ұзақ мерзімді перспективада бұл қоғамға зиян келтіруі мүмкін.

«Мұң-қайғы – жастарымызға серік емес»

Тоқаев әдебиет пен мәдениеттің мазмұнына да тоқталып, мұңға және «мәңгі қайғыратын ұлт» бейнесіне шамадан тыс мән беріліп жүргенін айтты.

«Мұң-қайғы – жастарымызға жаман серік. «Мұң-қайғы» біздің жастарымызға жараспайды», – деді президент.

Мемлекет басшысының айтуынша, мәдени және білім беру ортасы тарихтың күрделі кезеңдерін ғана көрсетіп қоймай, жастардың болашаққа деген сенімін қалыптастыруы керек.

НЗМ-дегі 18 жастағы оқушылардың оқуын қайта қарау ұсынылды

Президент Оқу-ағарту министрлігіне Назарбаев Зияткерлік мектептері мен кейбір жекеменшік мектептерде 18 жастағы оқушылардың білім алу қажеттілігін зерделеуді ұсынды.

«НЗМ мен жекеменшік мектептердегідей, мектепте он сегіз жастағы жасөспірімдерді ұстау қаншалықты дұрыс? Қазіргі балалардың физикалық тұрғыдан жедел дамып келе жатқанын ескерсек, бұл қаншалықты орынды?», – деді Тоқаев.

Бұл ретте президент қолданыстағы жүйені жою туралы айтқан жоқ. Ол жауапты министрлікке мәселені талдап, оны шешудің ықтимал жолдарын ұсынуды тапсырды.

Тоқаев мектептегі білім берудің бірыңғай стандарты қажет екенін де атап өтті. Сондай-ақ орта және техникалық-кәсіптік білім беру жүйесіне жасанды интеллектіні қолдануды реттейтін стандарттарды енгізуді тапсырды.

Астанада қазақ-қытай жасанды интеллект мектебі ашылуы мүмкін

Тағы бір бастама ретінде президент Астанада қазақ-қытай жасанды интеллект мектебін құру мүмкіндігін қарастыруды ұсынды. Оның айтуынша, мұндай мектепті ашу кезінде Қытайдың заманауи технологиялар саласындағы тәжірибесі мен жетістіктерін пайдалануға болады.

Мемлекет басшысы мектептен бастап техникалық және кәсіптік білім беруге, одан әрі университеттерде мамандар даярлауға дейінгі бірыңғай білім беру жүйесін қалыптастыру қажеттігін атап өтті.

Оқи отырыңыз:

Кентауда адам денесі табылғаны туралы хабарлама жұртты дүрліктірді

Атыраудағы әуежайда шетелдік қайтыс болды: Полиция мән-жайды мәлімдеді