Жамбылда полиция подполковнигі есірткі саудасы үшін сотталды

26 тамыз 2026 10:43 Жәукен Әсем

Фото: Pexels

Жамбыл облысында есірткінің заңсыз айналымына қатысты іс бойынша сот үкімі шықты, деп хабарлайды Orda.kz.

Жамбыл облысының Байзақ аудандық соты Жамбыл облысы ПД Ұйымдасқан қылмысқа қарсы күрес басқармасының жедел уәкілі, полиция подполковнигіне қатысты қылмыстық істі қарады. Ол Қазақстан Республикасы Қылмыстық кодексінің 297-бабы 3-бөлігінің 3-тармағында көзделген қылмыстық құқық бұзушылықты жасады деп айыпталған. Жедел уәкіл ұсталып, Жамбыл облысы бойынша ҰҚК департаментінің жұмыс орнында тінту жүргізілген.

Сот үкімімен полицей кінәлі деп танылып, бастапқыда 7 жылға бас бостандығынан айырылды.

«Қазақстан Республикасының жаңа Конституцияны қабылдауға байланысты рақымшылық жасау туралы» заңы ескеріліп, негізгі жазаның өтелмеген бөлігі үштен біріне қысқартылды. Нәтижесінде оған қылмыстық-атқару жүйесінің орташа қауіпсіздік мекемесінде өтеу үшін 4 жыл 8 ай бас бостандығынан айыру жазасы тағайындалды.

Сонымен қатар сот сотталған адамды полиция подполковнигі арнайы атағынан айыру туралы шешім шығарды. Үкімге сәйкес, жалпы салмағы 2 041,9 грамм есірткі заты, гашиш, сондай-ақ салмағы 250 грамм оның үлгісі сот актісі заңды күшіне енгеннен кейін жойылуы тиіс.

Сот үкімі заңды күшіне енген жоқ.

Оқи отырыңыз:

Жаңалықтар

барлық жаңалықтар