«АЭС құрылысына Ресей қатыса ма?»: Роман Скляр жауап берді

Қазақстанда АЭС құрылысының қалай жүзеге асатыны жайлы  бірінші вице-премьер Роман Скляр мен энергетика министрі Алмасадам Сәтқалиев үкімет маңында айтты, деп хабарлайды Orda.kz.

Алмасадам Сәтқалиевтің айтуынша, заманауи станциялар барлық қажетті қорғау құралдарымен жабдықталған және минималды тозаңдармен жұмыс істейді.

«Ол экологиялық қауіпсіз нысан болады, физикалық, энергетикалық, радиологиялық қорғау құралдарымен жабдықталған, минималды тозаңдармен және эксплуатациялық операцияларды бақылаудың 3 деңгейімен қамтамасыз етілген», — деді энергетика министрі.

Брифингте Сәтқалиевке АЭС аймағына көшуге дайын ба, деген сұрақ қойылды. Ол жауап ретінде құрылыс барысын бақылау үшін сол аумаққа ұзақ мерзімді жұмыс сапарымен баратынын айтты.

«Мен сол жерде тұрақты болуды жоспарлап отырмын. Электр энергиясының тапшылығын жабу жөніндегі ұсынылған шешімдерге жауапкершілік пен кәсіби міндеттерімді орындау үшін мен ұзақ мерзімді жұмыс сапарына дайынмын және өз нұсқауларыма сәйкес тексеру жүргіземін», — деп қосты министр.

Станцияны кімнің салатыны туралы сұраққа Роман Скляр пікір білдірді. Ол, АЭС құрылысында консорциум айналысатынын атап өтіп, Ресейдің қатысуы санкциялық тәуекелдерді ескере отырып қаралатындығын айтты.

«Біз станцияның заманауи болуын және онда жетекші елдердің жаңа жобалық шешімдері мен технологиялары қолданылғанын қалаймыз. Сондықтан шешім әлі қабылданады. Конфигурация бойынша бұл менің міндетім емес, арнайы жобалау тобы айналысады. Ал саяси тәуекелдерге байланысты сәт жобалау процесінде қаралатын болады. Егер мұндай тәуекелдер пайда болса, әр түрлі компаниялармен, әр түрлі елдермен келісімшарттарда санкциялық ережелер қарастырылатын болады. Бұл — заңды қадам болып есептелінеді», — деп қорытындылады Роман Скляр.

Сонымен қатар, Скляр Қазақстанда АЭС салу үшін консорциум құру мен құрамына қатысты шешім 2025 жылы қабылданатынын айтты. Консорциумға кемінде бес ел кіреді. Вице-премьердің айтуынша, келесі жылы жобаның қатысушылары кім болатыны анықталады. Сондай-ақ қажетті құжаттама әзірленеді және мердігерлер мен жобалаушылар таңдалады. Техникалық-экономикалық негіздемені дайындауға бір жыл, жобалау-сметалық құжаттаманы дайындауға 1,5 жыл қажет болады. Тек содан кейін станцияның құрылысы басталады.