Ормуз дауы: АҚШ пен Иран арасындағы келіссөз 21 маусымда Швейцарияда өтеді

АҚШ пен Иран арасындағы тікелей келіссөздер 21 маусымда Швейцарияда өтеді. Кездесу Ормуз бұғазы маңындағы жаңа келіспеушіліктер мен Израильдің Ливанға жасаған соққылары аясында ұйымдастырылмақ. Екі елдің делегациялары келіссөздерге қатысу үшін әлдеқашан келіп жеткен, деп хабарлайды Orda.kz BBC-ге сілтеме жасап.

Сенбі күні Тегеран Израильдің Ливанға жасаған соққыларына жауап ретінде Ормуз бұғазы қайта жабылғанын мәлімдеп, бұл әрекеттерді АҚШ пен Иран президенттері қол қойған өзара түсіністік туралы меморандумды бұзу деп атады. Алайда АҚШ әскери күштері бұл мәлімдемені жоққа шығарып, бұғаз арқылы кеме қозғалысы жалғасып жатқанын хабарлады.

Сенбі кешке АҚШ вице-президенті Джей Ди Вэнс Вашингтоннан Швейцарияға келіссөздерге ұшып шықты. АҚШ делегациясының құрамында сондай-ақ президенттің арнайы өкілдері Стив Уиткофф пен Джаред Кушнер бар.

Вэнс ұшар алдында ядролық мәселе мен Ливандағы атысты тоқтату бойынша ілгерілеуге қол жеткіземіз деген үмітін білдірді.

Иран делегациясы да Швейцарияға келіп жетті. Оның құрамында парламент спикері Мохаммад-Багер Галибаф пен сыртқы істер министрі Аббас Арагчи бар.

Ирандық БАҚ-тың хабарлауынша, делегациямен бірге қауіпсіздік қызметтерінің, орталық банктің және мұнай саласының жоғары лауазымды өкілдері де барған.

Иран Сыртқы істер министрлігінің өкілі Эсмаил Багаи Тегеранның «екінші тараптан өз міндеттемелерін орындауды талап ететінін» мәлімдеді.

Пәкістан премьер-министрі Шахбаз Шариф келіссөздердің ашылу рәсіміне қатысады. Бұған дейін Пәкістан соғыс барысында делдалдық жасап, АҚШ пен Иран арасындағы алдыңғы келіссөз кезеңін өз аумағында өткізген.

Негізі келіссөздер жұма күні өтуі тиіс болған, алайда Израильдің Ливанға жасаған шабуылдарына байланысты кейінге қалдырылды. Сенбі күні ирандық әскерилер Ливанға жасалған соққыларға жауап ретінде Ормуз бұғазын қайта жабатынын мәлімдеді.

Осы аптада АҚШ пен Иран президенттері соғысты дереу тоқтатуды, соның ішінде Ливандағы әскери қимылдарды доғаруды көздейтін алдын ала өзара түсіністік туралы меморандумға қол қойған болатын. 14 тармақтан тұратын бұл құжат алдағы 60 күн ішінде түпкілікті келісімге қол жеткізу үшін қосымша келіссөздер жүргізуді қарастырады.

АҚШ вице-президентінің айтуынша, Дональд Трамптың арнайы өкілі Стив Уиткофф пен америкалық келіссөз жүргізуші Джаред Кушнер қазірдің өзінде Швейцарияда жүр. Ол қажет болған жағдайда өзі де келіссөздерге қосылуы мүмкін екенін айтты.

Тегеранда да кездесуге дайындық жүріп жатқаны расталды. Швейцарияға сыртқы істер министрі Аббас Аракчи бастаған делегация аттанды. Делегация құрамында парламент спикері Мұхаммад Бағер Ғалибаф, Ұлттық қауіпсіздік кеңесінің, Орталық банктің және Сыртқы істер министрлігінің өкілдері бар.

АҚШ пен Иран арасындағы келіссөздерде делдал болып отырған Пәкістанның Сыртқы істер министрлігі техникалық консультациялар 21 маусымда Швейцарияның Бюргеншток қаласында өтуі тиіс екенін мәлімдеді. Келіссөздерге сондай-ақ Катар мен Пәкістан өкілдерінің қатысуы күтілуде. 

Оқи отырыңыз:

• Пезешкиан АҚШ-пен жасалған меморандумды «тарихи құжат» деп атады
• АҚШ пен Иран арасындағы өзара түсіністік меморандумының ресми жобасы жарияланды
• Ормуз бұғазы маңындағы Иран портында Қазақстанның өз алаңы болады