Берлин жұрты Шпрее өзенінде шомылуға салынған 101 жылдық тыйымға қарсы шықты

Берлин орталығында Шпрее өзенінде наразылық ретінде жаппай шомылу өтті — қатысушылар 101 жылдық тыйымды алып тастауды талап етті, деп хабарлайды Orda.kz.       

Германия астанасының орталығында шамамен 500 адам бр мезгілде Шпрее өзеніне түсіп, тағы сонша адам жағалауда өткен наразылық акциясына қатысты. Олар өзенде шомылуға салынған тыйымды алып тастауды талап етті, деп хабарлады rbb24 телеарнасына Flussbad Berlin ұйымының өкілі. Шомылушылардың арасында берлиндік саясаткер, социал-демократ Штеффен Крах та болған.

Берлиннің қала аумағындағы Шпрее өзенінде шомылуға 1925 жылдан бері тыйым салынған. Ол кезде бұл шешім өзеннің ластануы және соған байланысты денсаулыққа төнген қауіптермен түсіндірілген.

Берлин Сенаты (қала үкіметі) қазіргі таңда да қала орталығында шомылуға тыйым сақталып отырғанын, ешқандай ерекшелік қарастырылмағанын және оны алып тастауға негіз жоқ екенін мәлімдеді. Қоршаған ортаны қорғау басқармасының айтуынша, өзендегі су сапасы, мысалы, найзағайлы жаңбырдан кейін күрт нашарлап кетуі мүмкін.

Соңғы жылдары Берлинде жаз мезгілінде аптап ыстық жиілеп кеткен. Сондықтан қала ортасында өзенге түсіп, салқындау идеясы көптеген тұрғындар үшін барған сайын тартымды болып келеді. Бір жыл бұрын дәл осындай акция тыйымның мерейтойына орай ұйымдастырылып, оған да жүздеген адам қатысқан болатын.

Оқи отырыңыз:

• Қазақстан – сенімді одақтасымыз: Мемлекет басшысы Саида Мирзиёеваны қабылдады
• Қылмыстық жауапкершілік 12 жастан: Еуроодақ елдерінде жасөспірімдерге жаза қатаймақ
• Ормуз дауы: АҚШ пен Иран арасындағы келіссөз 21 маусымда Швейцарияда өтеді