Қызылордада ковид сынағы теріс нәтиже көрсеткен бүлдіршін көз жұмды

24 қаңтарда Қызылордада төртінші сынып оқушысы қайтыс болды. Денсаулық сақтау министрлігінің мәліметі бойынша оның  коронавирус сынамасы теріс нәтиже көрсетті. Баланың неден көз жұмғанын арнайы комиссия тексереді.

Он жасар баланың денесінде бөртпе пайда болып, кейін қатты ауырсына бастаған. Анықталғандай оны бастапқыда үйде емдеген.  

«Дәрігерге қаралғаннан кейін бала жұқпалы аурулар ауруханасына түсті. Коронавирустың сынамасы алынды. Нәтиже теріс болды, сондықтан 19 қаңтарда ол көпсалалы балалар ауруханасына ауыстырылды. Республикалық мамандардың кеңестері алынды. Өкінішке қарай, 24 қаңтарда оқушы қайтыс болды. Оның басты себебі - жүрек пен өкпенің жұмыс істемеуі», - деді облыстық денсаулық сақтау басқармасының басшысы Сәбит Пазилов.

Бала №8 мектептің төртінші сыныбының оқушысы. Ол оқу жылының басынан бастап қашықтықтан оқыған.

«Балада оқу үлгерімінде айтарлықтай проблемалар болған жоқ. Қашықтықтан оқытуға байланысты оған электронды құрал-жабдықтар берілді», - деді облыстық білім басқармасының бастығы Ақзира Қасымова.

Қазіргі уақытта облыста 89 258 студент (53%) қашықтықтан білім алуда, 80 636 студент (47%) дәстүрлі түрде білім алуда.