Қазақстанда амнистия арқылы қандай жазалар кешіріледі?

Қазақстан Республикасының жаңа Конституциясының қабылдануына байланысты амнистия туралы заң жобасы жарияланды. Кеше құжат пен оған ілеспе заң жобаларын мәжіліс қарауына қабылдады, деп хабарлайды  Orda.kz.       

Заң жобасы қабылданса,  қазақстандықтардың айыппұлдары амнистия арқылы кешіріледі, дегенмен  көптеген ерекшеліктер бар.

Сондай-ақ заң жобасында қылмыстық амнистия шарттары көрсетілген. Заң жобасына сәйкес, амнистия қылмыстық теріс қылықтар және (немесе) ауырлығы аз қылмыстар жасаған тұлғаларға, орташа ауырлықтағы, залал келтірмеген немесе келтірілген залалды толық өтеген, не азаматтық талап қойылмаған қылмыстарды жасаған тұлғаларға қатысты қылмыстық жауапкершіліктен немесе негізгі жазадан босатуды көздейді.

Жоғарыда аталған талаптарға кірмейтін орташа ауырлықтағы қылмыс жасаған тұлғаларға жазаның өтелмеген немесе орындалмаған бөлігі екі есеге қысқартылады.

Залалды толық өтеген немесе талап арыздар қойылмаған жағдайда жазаның өтелмеген бөлігі, атап айтсақ, ауыр қылмыстар бойынша – 1/3-ке, аса ауыр қылмыстар бойынша – 1/4-ке қысқартылады.
Басқа жағдайларда ауыр қылмыс бойынша – 1/4-ке, аса ауыр қылмыс бойынша – 1/5-ке қысқартылады.

Ауыр және аса ауыр қылмыс жасаған, теріс мінез-құлық дәрежесі жоқ және жазасының қалған мерзімі бір жылдан аспайтын сотталғандарға да жаза мерзімі қысқартылады.

Сонымен қатар заң жобасында амнистия қолданылмайтын тұлғалардың кең тізімі берілген. Атап айтқанда:

• сыбайлас жемқорлық қылмыстар жасағандар;
• терроризмге қатысты қылмыстар жасағандар;
• экстремистік қылмыстар жасағандар;
• кәмелетке толмағандардың жыныстық қолсұғылмаушылығына қарсы қылмыс жасағандар;
• азаптау фактілеріне қатысы барлар;
• қылмысты қайталап жасағандар;
• өмір бойына бас бостандығынан айырылғандар;
• қылмыстық топ құрамында әрекет еткендер;
• жазасын толық өтеп қойғандар;
• бірнеше қылмыс жасағандардың ішінде амнистияға жатпайтыны барлар;
• жаза өтеу кезінде қасақана қылмыс жасағандар;
• сот үкімі сырттай шығарылғандар;
• сондай-ақ кісі өлтіру, адам өліміне әкелу, суицидке жеткізу, ауыр дене жарақатын салу, адам саудасы, мемлекеттік сатқындық, тыңшылық, билікті күшпен басып алу, тонау, бопсалау және басқа да ауыр қылмыстар жасағандар.
  
  

Алайда сот тағайындаған әкімшілік жазалар және бірқатар құқық бұзушылықтар амнистияға ілікпейді 

21 мамырда Мәжіліс депутаты Снежанна Имашева әкімшілік амнистия аясында бірнеше миллиард теңге көлеміндегі айыппұлдар есептен шығарылатынын мәлімдеді. Негізінен бұл – ішкі істер органдары салған айыппұлдар, олардың басым бөлігі жол қозғалысы ережелерін бұзуға қатысты.

Оқи отырыңыз:

• Электромобиль сатылымы әлемнің 100 елінде рекордтық көрсеткішке жетті
• Атыраудағы рейдтен кейін не болды: Транзит нөмірлі көліктер дауы қайта ушықты
• Криштиану Роналду Сауд Арабиясының «Әл-Наср» клубына жеңіс сыйлады