Ақтауда пластикалық отадан кейін депутат қайтыс болды

Ақтауда пластикалық операциядан кейін депутат қайтыс болды. 49 жастағы Ербол Айтуов иек тұсына липосакция жасату үшін «Қасиет» клиникасына барған. 4 сәуір күні наркоз енгізу кезінде науқастың жағдайы күрт нашарлаған, деп хабарлайды Orda.kz.       

Марқұмның жұбайының айтуынша, дұрыс жасалмаған интубация салдарынан ер адамның қан қысымы мен қандағы қант деңгейі күрт көтеріліп, ишемиялық инсульт алып, комаға түскен. Бір айдан кейін ол көз жұмды. Туыстары медициналық мекеме көмекті дер кезінде көрсетпегенін және науқастың нақты жағдайын жасырғанын мәлімдейді.

Денсаулық сақтау министрлігінің жоспардан тыс тексерісі барысында клиникада бірқатар заңбұзушылықтар анықталған. Атап айтқанда, операциялық блок толық жабдықталмаған, кейбір құрылғылардың пайдалану мерзімі өтіп кеткен, ал анафилактикалық шокқа қарсы дәрілер болмаған.

Сонымен қатар, медициналық мекемеде ересектерге арналған анестезиология және реанимация қызметіне лицензия болмаған. Сондай-ақ науқастың қарсы көрсетілімдері мен толық талдаулар пакеті болмағанына қарамастан операцияға жіберілгені анықталды.

Тексеру материалдары прокуратураға жолданды.

Айтуов Маңғыстау облыстық мәслихатының депутаты болған, сондай-ақ 2023 жылдан бері Маңғыстау облысы Кәсіпкерлер палатасының өңдеуші өнеркәсіп және базалық салалар комитетін басқарған.

Еске салайық, 15 мамыр күні Алматыдағы пластикалық хирургия клиникасында 53 жастағы блогер Сәуле Базархан да көз жұмған. Ол да липосакция жасатуды жоспарлаған еді.

Алматыда блогер қаза тапқан пластикалық хирургия клиникасын денсаулық сақтау министрлігі тексере бастады. 53 жастағы Сәуле Базархан липосакция жасатуға өз аяғымен барып, орталықтан мәйіті шыққан.

Марқұм Сәуле Базархан оқиға болар күні жұмысынан сұранып барған.  Орталыққа онымен бірге бір туысы еріп барған. Бірақ бір жарым сағатқа жоспарланған ота ұзаққа созылып, біраз уақыттан соң дәрігерлер ары-бері жүгіріп әбігерге түсе бастаған. Сол жерде тұрған туысына ештеңе айтпаған.Тек арада үш сағат өткенде клиникадағылар жедел жәрдем шақыртады. Қаралы хабарды туыстары жедел жәрдем қызметкерлерінен естиді.

Оқи отырыңыз:

• Талдықорғанда асханада болған жанжал әйел өлімімен аяқталды
• Отарда сарбаз ауыр жарақат алды: Қылмыстық іс қозғалды
• Бір донор - бес адамды құтқарды: Министрлік барлық отаның сәтті өткенін мәлімдеді