Астанада екі пәтерді жалға алып есірткі дайындаған адам ұсталды

Астанада екі пәтерді жалға алған тұрғыннан ірі көлемдегі есірткі партиясы тәркіленді. Ішкі істер министрлігінің баспасөз қызметінің хабарлауынша, елорда тұрғыны есірткі сақтау және тарату күдігімен ұсталды, деп хабарлайды  Orda.kz.       

«Кейін анықталғандай, ер адам тағы бір пәтерді жалға алып, онда тыйым салынған заттарды сақтаған. Балконнан ақ түсті, ерекше иісі бар ұнтақ тәрізді зат салынған 10 полиэтилен орама табылды. Алдын ала болжам бойынша, бұл — мефедрон. Сондай-ақ заттың қалдықтары бар контейнерлер, зип-пакеттер, электронды таразы және түрлі түсті изолента тәркіленді» деп жазылған хабарламада. 

Полиция мәліметінше, 35 жастағы астаналықты тұрғылықты жерінде ұстау кезінде жасыл түсті, өзіне тән иісі бар зат салынған орамалар табылған. Алдын ала болжам бойынша, бұл — марихуана.

Аталған факті бойынша қылмыстық іс қозғалды, табылған барлық заттар тәркіленді.

Медициналық сараптама ұсталған адамның есірткі қолданғанын растады. Ер адам қамауға алынды.