АҚШ грин-карта алу ережелерін қатаңдатты, өтініш беру үшін шетелдіктер елден шығуы тиіс

АҚШ-тың Азаматтық және иммиграциялық қызметі (USCIS) 22 мамыр, жұма күні иммигранттарға арналған виза мен грин-карта алу ережелеріне өзгерістер енгізілгенін мәлімдеді, деп хабарлайды Orda.kz. 

Енді өтінішті АҚШ аумағында тапсыруға болмайды,  ол үшін шетелдіктер өз азаматтығы бар елге оралып, сол жерде америкалық консулдыққа жүгінуі тиіс.

Алайда бұл талап «ерекше жағдайларда» қолданылмауы мүмкін екенін USCIS өкілі Зак Калер атап өтті.

АҚШ Азаматтық және иммиграциялық қызметінің баспасөз хабарламасында әрбір өтініш бойынша барлық мән-жай мен деректер жеке қарастырылып, өтініш берушіге мұндай ерекше жеңілдік беруге негіз бар-жоғы анықталатыны айтылған.

«Біз шетел азаматтарының елдің иммиграциялық рәсімдерінен дұрыс өтуін қамтамасыз ету үшін заңның бастапқы мәніне қайта оралып отырмыз. Енді АҚШ-та уақытша жүрген шетелдік азамат грин-карта алғысы келсе, ерекше жағдайларды қоспағанда, өз еліне оралып, өтінішті сол жақтан беруі тиіс. Бұл саясат иммиграциялық жүйенің заңға сай жұмыс істеуіне мүмкіндік береді және олқылықтар жойылады. Шетелдіктер өтінішті өз елінен бергенде, тұрақты тұру мәртебесінен бас тартылса да АҚШ-та заңсыз қалып қоятындарды іздеу және депортациялау қажеттілігі де азаяды», – деді Зак Калер. 

USCIS өкілдері студенттер, уақытша жұмысшылар немесе туристік визамен келген адамдар АҚШ-қа белгілі бір мерзімге және нақты мақсатпен келетінін, сондықтан олардың иммиграциялық мәртебесі жоқ екенін еске салды.

«Біздің жүйе олардың сапары аяқталған соң елден кетуін көздейді. Олардың елде болуы грин-карта алу үдерісінің алғашқы кезеңіне айналмауы тиіс. Заңды сақтау мұндай істердің басым бөлігін АҚШ мемлекеттік департаменті арқылы шетелдегі америкалық консулдықтарда қарауға мүмкіндік береді және USCIS-тің шектеулі ресурстарын басқа санаттағы істерге, соның ішінде зорлық-зомбылық пен адам саудасы құрбандарына арналған визаларға, азаматтық алу өтініштеріне және басқа да басым бағыттарға жұмылдыруға жағдай жасайды» деп жазылған хабарламада. 

USCIS сондай-ақ бұл иммиграциялық заң бұрыннан бар екенін, бірақ оның талаптары ұзақ жылдар бойы сақталмағанын, ал енді оны орындау жүйені «әділ әрі тиімді» етуге көмектесетінін атап өтті.

Грин-картаға өтініш беру онсыз да күрделі процесс саналады және бірнеше айдан бірнеше жылға дейін созылуы мүмкін. Жаңа ереже АҚШ-тағы жүздеген мың иммигрантты өтініштері қаралғанша жұмысын, отбасын уақытша тастап кетуге мәжбүр етуі ықтимал.

Ереженің қатаңдатылуы іс жүзінде ел ішінде грин-карта алудың үйреншікті жолын миллиондаған иммигрант үшін жабады. Бұл студенттерге (F-1 визасы), білікті мамандарға (H-1B), туристерге (B-1/B-2), сондай-ақ АҚШ азаматтары мен грин-карта иелерінің отбасы мүшелеріне қатысты.

Бұған дейін Дональд Трамп Браун университетіндегі атыстан кейін грин-карта беруді уақытша тоқтату туралы тапсырма бергені хабарланған болатын. Мұндай шаралар АҚШ-қа террористердің ену қаупін болдырмау мақсатында қабылданған.

Оқи отырыңыз:

• Шетел азаматтығына уәде беріп, жұрттан 900 миллион теңге жинап алған туристік фирманың иесі сотталды
• АҚШ пен Иран келіссөзді қайта бастау үшін тағы да бір-біріне талап қойды
• Лионель Месси долларлық миллиардер атанды