«Үйіне рұқсатсыз кірген»: 58 жастағы әйелді ауылдасы ұрып, зорламақ болды

14 қаңтарда «Не молчи» қорына 58 жастағы әйелдің қызы көмек сұрап келген, деп хабарлайды Orda.kz. 

Былтыр 25 қазан күні қыздың анасы ұйықтап жатқан кезде, үйге бөтен ер адам кіріп, оны ұрып-соққан. Әйелді ер адам көк ала қойдай етіп сабаған, кейін зорлауға тырысқан. Қызының айтуынша, әйелдің денесінде көгермеген жер қалмапты. Таңертең оны көршісі байқап, жедел жәрдем шақырған.

Ауруханаға полиция қызметкерлері де келген. Бірақ олар әйелден сұрақ-жауап алып, арыз жазбапты. Ал аурухана аз уақыт ішінде әйелді шығарып жіберген. Қызы қараша айында жекеменшік ауруханаға жатқызып, анасын емдеткен. 

58 жастағы әйелді ұрып-соққан күдікті 26 қазан күні үйге қайта келіп, қылмыс жасаған ол емес екенін айтып ақталған. Бірақ әйелдің қызы сенбегеннен кейін, оған ақша ұсынған. Қыз прокуратураға жүгінді. Ол ер адамның әлі күнге дейін ұсталмағанын, бір күн де қамалмағанын айтады.

10 қаңтарда тергеу мерзімі тоқтатылған. Бірақ 58 жастағы әйел мен оның қызы бұл туралы білмеген. Күдікті бостандықта жүр. Тергеу болса 3 айға созылып, тоқтап қалды. Ал қызы анасын өзінің үйіне алып кеткен. Әйелдің үйіне камера орнатқан. 

Былтыр 16 желтоқсанда полиция көлігімен полиция формасын киген адамдар үйге келіп, жан-жақты тексерген. Қызы бұлар кім екенін, кімнің тапсырмасымен келгенін білмей отыр. 

«Не молчи» қоры тергеушінің тергеуді аяқтауға мүдделі еместігін айтты. Біреудің үйіне баса көктеп кіріп, оны ұрып кету, зорлауға тырысу қылмыс болып саналатынын мәлімдеді.