Ақтөбелік 62 жастағы зейнеткер «америкалық бойфрендіне» бар ақшасын аударып жіберген

«Жалған америкалық бойфренд» ақтөбелік әйелді бір миллион теңгеге алдап кетті. Зардап шеккен адам 62 жастағы зейнеткер әйел, деп хабарлайды Orda.kz.        

Бір күні әлеуметтік желіде оған өзін АҚШ-тың отставкадағы офицері ретінде таныстырған бейтаныс адам достық ұсыныс жіберген.

«Шетелдікпен» арадағы байланыс ұзақ уақытқа созылған. Ол ақтөбелік әйелге қызығушылық танытатынын жасырмай, әңгімені біртіндеп болашақтағы кездесуге қарай бұрып отырған.

Алайда кездесу еш болмай, біраз уақыттан кейін «америкалық» өзінің күрделі мәселеге тап болғанын айтып, Ақтөбеге келген соң ақшаны қайтарып беруге уәде етіп, қаржылай көмек сұраған.

Оның сөзіне сенген зейнеткер әйел бірнеше аударым арқылы шамамен 1 миллион теңге жіберген. Ақшаны алғаннан кейін ер адам байланысқа шықпай қойған. Сол кезде әйел алаяқтың құрбаны болғанын түсініп, полицияға жүгінген.

«Қаскөйлер әлеуметтік желілер мен мессенджерлерде көбінесе жалған «тұлға» жасап, өздерін шетелдік әскери қызметкер, дәрігер, инженер немесе табысты кәсіпкер ретінде таныстырады. Олардың басты мақсаты – сенімге кіріп, түрлі сылтаумен ақша алу», деп мәлімдеді Ақтөбе облысы полиция департаменті. 

Аталған факті бойынша сотқа дейінгі тергеу жүргізіліп жатыр. Полиция азаматтарды интернеттегі бейтаныс адамдарға сенбеуге тағы да шақырды.

Оқи отырыңыз:

• «Босану туризмі»: АҚШ-қа барып босанып, азаматтық алатындардың жолы кесіледі
• Ақмола облысында екі баланың анасын сталкер танысы қатыгездікпен ұрып өлтірді
• Жетісу облысында көпбалалы ана күйеуін өлтірді деген күдікпен қамалды