Қазақстаннан Қытайға уранды заңсыз шығармақ болған алты адам сотталды

Жетісу облысында ядролық материалдармен заңсыз жұмыс істеп, уран концентратын Қазақстаннан Қытайға контрабандалық жолмен шығаруға әрекет жасау ісі бойынша алты адамға үкім шықты, деп хабарлайды Orda.kz.        

Облыстық соттың баспасөз қызметі хабарламасында айтылғандай, Жетісу облысының Панфилов аудандық соты ҚР Қылмыстық кодексінің 283-бабы 2-бөлігі (ядролық материалдармен заңсыз жұмыс істеу, сақтау, тасымалдау және өткізу), 286-бабы 2-бөлігінің 1 және 4-тармақтары (алдын ала сөз байласқан адамдар тобының бірнеше рет жасаған ядролық материалдарды контрабандалық жолмен алып өтуге әрекеті), сондай-ақ 284-бабы 2-бөлігінің 2 және 3-тармақтары (қызметтік өкілеттіктерді пайдаланып ұрлық жасау) бойынша айыпталған алты сотталушыға қатысты үкім шығарған.

Сот дерегінше, айыпталушылар уран концентратын заңсыз жолмен шығаруды ұйымдастырған. Материал кәсіпорындардың бірінен ұрланып, кейін бірнеше адам арқылы тасымалданып, ел аумағынан шығарылмақ болған.

Радиоактивті зат Нұр Жолы өткізу пунктінде анықталған. Сараптама тәркіленген заттың уран концентраты екенін және оның радиация деңгейі рұқсат етілген мөлшерден бірнеше есе жоғары болғанын растады.

Сот шешімімен айыпталушылар Й., К. және Р. 7 жыл 6 айға бас бостандығынан айырылды. Ж. 4 жыл 6 айға, ал М. мен С. 2 жыл 6 айға сотталды. Олар жазаларын орташа қауіпсіздік мекемелерінде өтейді.

Үкім әлі заңды күшіне енген жоқ.

Оқи отырыңыз:

• Трамп Иранмен келісімге қол қою үшін Женеваға өзі баруы мүмкін екенін айтты
• Петропавлда бойжеткен мешітке кіріп, имамның қалтасын қағып кетті
• Маңғыстауда Джеки Чан қатысқан фильмнің түсірілімі басталды