Әл-Фарабидегі апат: Пак Zeekr көлігіне неліктен жалған нөмір тағып алғанын айтты

Әл-Фараби даңғылында болған жөл-көлік апатына қатысты сот отырысында сотталушы Александр Пак өз көлігіне неліктен жалған нөмір таққанын айтты, деп хабарлайды Orda.kz.

Марқұм Еламан Тілемесовтің өткен сот отырысында қорғаушысы өзгергенін жазған едік. Іске келген жаңа адвокат Гүлмира Бабажанова қазір әлеуметтік желіде тарап кеткен сотталушы марқұмдардың туысына 100 млн теңгеден берді деген ақпарат жалған екенін айтты. Бабажанова нақты 100 млн алмағанын білсе де, Пактың туыстары моральдық өтемақы алғанынан хабарсыз екенін айтты.  

«Марқұмның жақындары айыпталушының қарт анасы мен кәмелетке толмаған үш баласының жағдайын ескеріп, оларға жанашырлық танытқан. Сонымен қатар, қорғаушы жәбірленушілер 100 миллион теңге өтемақы алды деген қауесетті жоққа шығарғым келеді. Отбасы қыруар қаражат талап етпеген, тек кінәлі тарап өз шамасына қарай ерікті түрде материалдық көмек көрсетті. Кешірім беру жүргізушіні жауапкершіліктен босатпайды. Заңға сай, татуласу тек жазаны жеңілдететін мән-жай ретінде ескерілуі мүмкін. Ал айыпталушыға қандай жаза тағайындалатынын тек сот шешеді», – деді Бабажанова.

Сонымен қатар сотта Александр Пактан Zeekr көлігіне неге басқа мемлекеттік тіркеу нөмірін тағып алғаны жайлы сұралды. 

Дегенмен, іс материалдары оның жол ережесін жүйелі түрде бұзатынын көрсетті. Судья оқыған құжаттың алғашқы 94 парағы түгелдей Пактың жылдамдық асыруы мен басқа да заңбұзушылықтарынан тұрады.

Алайда адвокаты бұл жағдайға қатысты пікір білдіріп, Алматы сияқты үлкен қалада ереже бұзбайтын, көлігін қате жерге қоймайтын немесе жылдамдықты асырмайтын жүргізуші мүлдем жоқ екенін айтып, оның әрекетін ақтап бақты. 

Түстен кейінгі сот процесінде ос іс бойынша анықтаушы Шухрат Мұхтаров жауап берді. Сотқа онлайн қатысқан анықтаушыға тек қана сотталушының адвокаты сұрақтар қойды. Қорғау тарабының сұрақтарының басым бөлігі анықтаушының оқиға орны мен алкогольды анықтау үшін алынған сараптама қалай жасалғаны жайлы болды.

Қорғау тарабы арнайы сараптамасыз Zeekr көлігіндегі техникалық ақау нұсқасын толық жоққа шығаруға болмайды деп есептейді. Анықтаушыдан сотталушының адвокаты тергеу барысында көліктің техникалық ақауы болуы мүмкін деген болжамның тексерілген-тексерілмегенін сұрады.

Шухрат Мұхтаровтың сөзінше, көлік 2025 жылы шығарылған жаңа автокөлік болғандықтан, техникалық сараптама тағайындауға негіз болмаған. Бұдан кейін адвокат жаңа көлікте ақау болуы мүмкін емес деп санайсыз ба деген сауал қойды.

Неліктен тергеу көлікке техникалық сараптама тағайындамағаны туралы сұраққа Мұхтаров мұндай қажеттілікті көрмегенін айтты.

«Бұл жол-көлік оқиғасында техникалық сараптама жүргізуге негіз болған жоқ деп санаймын. Меніңше, бұл – қорғау тарабының жауапкершіліктен жалтару үшін келтіріп отырған уәжі», – деді ол.

Осы сот отырысында Александр Пактың қорғаушылары кешенді техникалық сараптама тағайындау туралы өтінішхат берді. Судья бұл өтінішхаттың жауабын келесі отырысқа қалдырды. 

Бұдан бөлек, Александр Пактың қан үлгілерінің сақталуына қатысты мәселе де көтерілді. Қорғау тарабының мәліметінше, қан сынамалары 21 наурызда алынғанымен, сараптамаға тек төрт күннен кейін жолданған.

Бұл мәселеге қатысты жауап берген аға анықтаушы Шухрат Мұхтаров кешігу мереке күндеріне байланысты болғанын айтты. Оның сөзінше, сол уақытта сот сараптамасын тағайындап, материалдарды бірден жолдауға мүмкіндік болмаған. Сондықтан қан үлгілері бөлімдегі арнайы тоңазытқышта сақталып, алғашқы жұмыс күні сарапшыларға жіберілген. Анықтаушы қан Цельсий бойынша 1-2 градус температурада сақталғанын мәлімдеді.

Алайда қорғау тарабы бұл мәліметтердің құжат жүзінде расталмағанына назар аударды. Адвокаттың айтуынша, қылмыстық іс материалдарында қан үлгілерінің қандай жағдайда сақталғанын және барлық қажетті рәсімдердің сақталғанын дәлелдейтін құжаттар жоқ.

«Біз медициналық мекемелерден жауаптар алдық. Алайда қылмыстық іс материалдарында қан үлгілерінің сақталу жағдайларын және олармен жұмыс істеу тәртібі сақталғанын растайтын құжаттар жоқ», – деді адвокат.

Келесі сот отырысында полиция қызметкері әрі Пакпен сол кеште дастархандас болған Әсет Жақсылықовтан жауап алынып, тараптар жарыссөзге өтеді.

Еске салсақ, 21 наурызда Әл-Фараби даңғылында мас күйдегі Пак жалған нөмірмен 219 км/сағ жылдамдықпен жүріп, 3 адамды мерт қылған. Бұған дейін марқұмдардың туыстары өтемақы алып, кінәліні кешірген болатын. 

Оқи отырыңыз:

• Вискиді даяшы ішті ме? Әл-Фараби даңғылында үш адамның өмірін жалмаған Пак прокурордың сұрағына жауап беруден бас тартты
• Әл-Фарабидегі жол апаты: Сотта жаңа жәбірленуші пайда болды