Маңғыстауда Джеки Чан қатысқан фильмнің түсірілімі басталды

«Құдыретті сауыт 4: Ультиматум» фильмінің алғашқы кадрлары Маңғыстаудың бірегей табиғи ландшафттарында түсірілді. Фильм 2027 жылдың ақпан айында прокатқа шығады деп күтілуде, деп хабарлайды Orda.kz.

Маңғыстау облысы әкімдігінің мәліметінше, фильмнің негізгі түсірілім орындарының бірі  әлемге ерекше табиғатымен әйгілі — Бозжыра шатқалы. Бұл жерде 35 адамдық түсірілім тобы 7–12 маусым аралығында жұмыс істеген.

Түсірілім жұмыстарын осы жылдың өзінде аяқтау жоспарланып отыр, ал фильм 2027 жылдың ақпанында көрерменге жол тартады. Аймақ билігінің пікірінше, бұл жоба тек отандық киноиндустрия үшін ғана емес, сонымен қатар Қазақстанды әлемдік туризм картасында танытуға және өңірдің инвестициялық тартымдылығын арттыруға ықпал етеді.

Бұған дейін Қаскелең қаласында да арнайы кинопавильон салынып жатқаны хабарланған еді. Онда да «Құдыретті сауыт 4» фильмінің кейбір көріністері түсіріледі деп жоспарлануда.

Еске салсақ, былтыр Salem Entertainment медиакомпаниясы Джеки Чан басты рөлде ойнайтын «Құдіретті сауыт» («Доспехи Бога») фильмінің төртінші бөлімі Қазақстанда түсірілетінін мәлімдеген болатын. Жобаға қатысты алғашқы келіссөздер Бейжіңде өткен. Дегенмен негізгі түсірілім жұмыстары Қазақстан аумағында жүргізіледі.

Оқи отырыңыз:

• Геннадий Головкин Джеки Чанға қазақтың шапанын сыйлады
• Джеки Чан мен «Оскар» иегерлері Қазақстанда фильм түсірмек
• Қазақстанда Джеки Чан ойнайтын жаңа «Құдіретті сауыт» фильмі түсіріледі