Танымал айтыскер ақын Салтанат Өтелбаева жұбайымен бірге жол апатынан қаза тапты

Танымал айтыскер ақын, мәдениет саласының үздігі Салтанат Өтелбаева мен жұбайы жол апатынан қаза тапты, деп хабарлайды  Orda.kz.       

Салтанат Өтелбаева  — айтыскер ақын, мәдениет саласының үздігі, тарих ғылымдарының магистрі, Ыбырай Алтынсарин музейі басшысының орынбасары. Жол-көлік оқиғасы кезінде оның жанында болған жұбайы Мырзабек Қасымов та көз жұмған.

Бұл туралы Айтыс ақындары мен жыршы-термешілердің халықаралық одағы республикалық қоғамдық бірлестігінің мүшесі Марғұлан Оспанов әлеуметтік желідегі парақшасында хабарлады. Оның сөзінше, Атбасар мен Есілдің ортасында жол апаты болған.

«Суық хабарды жеткізуге мәжбүрмін. Жалған өмір-ай, десейші! Бүгін айтыскер ақын, мәдениет саласының үздігі, тарих ғылымдарының магистрі, Ыбырай Алтынсарин музейі басшысының орынбасары Салтанат Өтелбаева жол апатына түсіп, жұбайы Мырзабек Қасымов екеуі де қаза тапты. Жалғыз ұлы таңғы тоғызда «аға, ата-анамнан айрылып қалдым» деп хабарласты. Бүгін қызы мектепті үздік бітіріп, қызыл аттестатын алатын күні еді. Үлгеремін деп асықты ма екен, Астанадан таңғы төртте жолға шығып кетіпті», - деп жазды ол. 

Мәліметке сүйенсек, Салтанат Амантайқызы саналы ғұмырын мәдениет пен музей ісіне, тарихи-мәдени мұраны сақтау мен насихаттауға арнаған. 

Әріптестерінің айтуынша, ол кәсіби біліктілігімен, жауапкершілігімен және ұйымдастырушылық қабілетімен ерекшеленген. Оның жетекшілігімен музейде бірқатар маңызды жобалар, көрмелер мен ғылыми-зерттеу жұмыстары жүзеге асқан.

Әлеуметтік желіде жұртшылық марқұмдардың отбасы мен туған-туыстарына көңіл айтып, олардың жарқын бейнесі ел жадында сақталатынын жазып жатыр.

Оқи отырыңыз:

• ҚР СІМ АҚШ-та жоғалған қазақстандықтың қаза тапқанын ресми растады
• Қазақстаннан Қытайға уранды заңсыз шығармақ болған алты адам сотталды
• Цифрлық із: Қазақстандықтар eGov-та өз деректерін кім сұратқанын көре алады