Жолаушылар тасымалы бағасының өсіп кеткеніне ҚТЖ не дейді?

Қазақстан темір жолы жолаушылар тасымалы билеттерінің қымбаттауын тарифтердің жыл сайынғы индексациясымен түсіндірді. Биыл бұл көрсеткіш 7% болған, деп хабарлайды Orda.kz.       

Бұл туралы компания басқарма төрағасының стратегия және цифрландыру жөніндегі орынбасары Әнуар Ахметжанов мәлімдеді.

Оның айтуынша, пойыз билеттерінің бағасы жыл бойы өзгеріссіз қалады.

«Бізде теміржол тасымалының бағасы жыл бойы бірдей болады. Ол маусымға да, тәулік уақытына да байланысты емес. Жыл сайын Көлік министрлігімен жасалған келісімге сәйкес индексация жүргізіледі. Биыл 1 қаңтардан бастап билет бағасы 7%-ға өсті. Ал өткен жылғы инфляция 12%-дан асты», – деді Ахметжанов. 

Оның сөзінше, әуе билеттерінен айырмашылығы – пойыздағы жолақы сұраныс пен маусымға тәуелді емес.

«Мысалы, белгілі бір бағыттағы билет шамамен 35 мың теңге тұрады және бұл баға қаңтардан желтоқсанға дейін өзгермейді. Ал авиацияда жағдай басқа: кей кезеңдерде билет бағасы осындай немесе одан да арзан болуы мүмкін. Бірақ маусым қызғанда ұшақ билеттері 70–100 мың теңгеге дейін қымбаттайды. Онда динамикалық баға белгілеу жүйесі бар, ал бізде баға тұрақты», – деді ол. 

Бұған дейін Олжас Бектенов ҚТЖ-ның транзиттік тасымал саласындағы жұмысын сынға алған болатын. Оның айтуынша, компания жоспарланған көрсеткіштерді орындай алмай отыр.

Мәселен, жоспар бойынша 23 миллион тонна жүк тасымалдануы тиіс болса, іс жүзінде тек 16 миллион тонна ғана жеткізілген.

Премьер-министр ұлттық тасымалдаушы басшылығына транзиттік тасымал жоспарын толық орындауды тапсырып, нәтижеге тікелей жауапкершілік жүктелетінін атап өтті.

Бұған дейін әрбір Қазақстан темір жолы жолаушысы мемлекетке шамамен 8 мың теңгеге түсетіні туралы ақпарат жарияланған еді.

ҚТЖ мәліметінше, билет бағасының өсуі – инфляция мен тарифтерді кезең-кезеңімен жаңарту саясатының нәтижесі. Соған қарамастан, компания теміржол тасымалындағы бағаның тұрақтылығын сақтап отырғанын алға тартады.

Оқи отырыңыз:

• ҚТЖ топ-менеджменті бір жылда бір миллиард теңгеден астам сыйақы алды
• Алаяқ азаматтарға жүргізуші куәлігін алып беремін деп уәде беріп, алдаған
• Ақтөбелік 62 жастағы зейнеткер «америкалық бойфрендіне» бар ақшасын аударып жіберген