Ұлттық банк Қазақстандағы базалық мөлшерлемені қандай мәнге дейін төмендетеді?

ҚР Ұлттық банк төрағасы Тимур Сүлейменов реттеуші базалық мөлшерлемені қаншаға төмендетуді жоспарлап отырғанын айтты.

Оның айтуынша, қолайлы мөлшерлеме экономикалық жағдай мен инфляцияға байланысты. Ал базалық мөлшерлеме – инфляциямен күресудің бір жолы. Ол бәсеңдеген сайын монетарлық реттеуші мөлшерлемені біртіндеп төмендетеді. Ол бірнеше жолмен есептеледі.

«Біздің инфляция бойынша мақсатты көрсеткішке қол жеткізуге және тұрақты ұстауға тиіспіз, біздің жағдайда бұл 5% және орташа экономикалық өсім. Орта есеппен экономика 3-4 пайызға өседі. Біз бұл туралы бір рет айтқан болатынбыз, сол кездегі нақты мәнде базалық мөлшерлеме – инфляция + 3,5%. Бұл базалық мөлшерлеменің белгілі бір табиғи немесе бейтарап деңгейі»,- деп атап өтті Сүлейменов. 

Бұл базалық мөлшерлеме инфляцияны жеделдетпеуге және экономикалық өсуді тежемеуге мүмкіндік береді. Инфляция деңгейі 5% болғанда Қазақстандағы базалық мөлшерлеме 8,5% болуы мүмкін.

24 қарашада ақша-несие саясаты комитеті базалық мөлшерлемені +/- 1,0 пайыздық тармақ дәлізімен жылдық 15,75% деңгейінде белгіледі. Бұл шешім Ұлттық банктің нақтыланған болжамдары негізінде қабылданды.