Талдықорғандағы Назарбаев көшесін Тәуелсіздік деп атауға дайынбыз - әкім

Жетісу билігі экс-президент Нұрсұлтан Назарбаевтың атындағы көшенің атын өзгертуге және оның ескерткішінен бас тартып, ұлы ақын Абай Құнанбаевтың ескерткішін орнатуға дайын, деп хабарлайды ҚазТАГ облыс әкімінің баспасөз қызметіне сілтеме жасап.

- Абай Құнанбаевтың ескерткішін орнату мәселесі үшінші жыл шешімін таппай келеді, неге шешілмейді? – деп сауал қойды Талдықорған қаласының тұрғыны облыс әкімі Бейбіт Исабаевпен кездесуде.

Аймақ басшысы ақын ескерткішінің құны қазірдің өзінде 300 млн теңгеге дейін бекітілгенін айтты.

- Ақшаның бір бөлігі алдын ала төленді. Бабамыздың ескерткіші Алматыдағы шеберханада құйылып жатыр. Оның биіктігі тұғырды есепке алғанда 9 метрге жетеді. Бұл үлкен ескерткіш болады. Екі-үш айдың ішінде дайын болады. Ендігі мәселе – бұл ескерткішті Жетісу өңірінің қай жерінде орнату керек? Менің ойымша, оны қаланың орталығына орнату керек, - деді Исабаев.

Одан кейін жиынға қатысқан тағы бір тұрғын бөлек ұсыныс айтты.

- Сізге, облыс басшысына айтар болсам, орталықта Абай көшесіне жастар Абай әндерін шырқайтын ескерткіш орнату туралы ұсыныс бар. Ал екіншісі – Назарбаев көшесінің бұрынғы атауы – Тәуелсіздікке қайтарылуы – көпшіліктің тілегі, - дейді қала тұрғыны.

Қажет болса, жұртшылық қажетті қолды жинауға дайын екенін қосты.

- Егер бұл Жетісу өңірі тұрғындарының көпшілігінің пікірі болса, әрине, біз оны тыңдаймыз, - деді Исабаев.

Айта кетсек, Қазақстанның еңбек сіңірген қайраткері Айтақын Бұлғақов Талдықорған әкімінің Талдықорған халқымен кездесуінің алдында қаңтар оқиғасы кезінде бұзылған Назарбаев ескерткішінің орнына Абай ескерткішін орнатуға шақырған болатын.