Алматыдағы «Гелик» қатысқан жол апатынан аман қалған әйелдің жағдайы белгілі болды

Рысқұлов даңғылында кеше түнде болған жол-көлік оқиғасынан зардап шеккендердің бірі жансақтау бөлімінде жатыр. 35 жастағы әйелдің біраз жері сынып, өзге де жарақат диагнозы қойылған, деп хабарлайды Orda.kz.

Қалалық денсаулық сақтау басқармасы мәліметінше, әйел 27 шілде күні сағат 04:05-те №7 қалалық клиникалық ауруханаға жеткізілген. Дәрігерлер одан көптеген жарақат, оның ішінде бірнеше сүйегінің сынғаны және жұмсақ тіндерінің зақымданғанын анықтаған.

«Қажетті шұғыл емдеу-диагностикалық шаралары жүргізіліп, сынған сүйектері салынды. Қазіргі уақытта науқас жансақтау бөлімінде жатыр. Жағдайы ауыр деп бағалануда», деп хабарлады басқарма өкілдері. 

Еске сала кетейік, жол апаты Рысқұлов даңғылы мен Шәріпов көшесінің қиылысында болған. Полицияның алдын ала мәліметінше, Suzuki көлігінің жүргізушісі батыс бағытта келе жатып, кері бұрылу кезінде қарсы бағытта жүріп келе жатқан Mercedes көлігімен соқтығысқан.

Салдарынан Suzuki жүргізушісі мен жолаушылардың бірі оқиға орнында қаза тапты. Тағы бір жолаушы мен Mercedes жүргізушісі түрлі жарақаттармен ауруханаға жеткізілді.

Аталған факті бойынша полиция екі адамның өліміне әкелген жол апаты бойынша қылмыстық іс қозғады. Қазіргі уақытта оқиғаның барлық мән-жайы анықталуда.

Оқи отырыңыз:

• Алматыда түнгі жол апатынан екі қыз қаза тапты