Вице-министр Астанадағы су тасқыны туралы: «Табиғаттан құдыретті емеспіз»

Қазақстанның өнеркәсіп және құрылыс вице-министрі Олжас Сапарбеков соңғы төпеп жауған жаңбыр кезінде қысқа уақыт ішінде Астанадағы көшелерді су басқан жағдайға қатысты пікір білдірді, деп хабарлайды Orda.kz.       

Ол табиғи апаттарға байланысты нөсер кезінде арнасынан тасыған кәріз жүйесін жаңғырту қажеттілігіне күмән келтірді.

«Иә, мұндай жағдайлар болып тұрады. Біз қоғамда, әлемде өмір сүріп жатырмыз, ал табиғат бізге толық бағынбайды. Кейде жауын-шашын қалыпты мөлшерден әлдеқайда көп болып жатады. Бұндай кезде осындай жағдайлар болады. Біз де осы өңірдің тұрғыны ретінде белгілі бір қолайсыздық сезінеміз. Бірақ мұндай жағдай күнде қайталанып жатпағанын түсіну қажет. Белгілі бір кезеңде болуы мүмкін табиғи апаттарға алдын ала дайындық үшін қомақты қаражат жұмсау – бұл үлкен шығын. Ал ол өз кезегінде бюджетке салмақ түсіреді. Сондықтан оның қаншалықты қажет екенін бағалап, талдап, сараптама жасау керек», – деді Сапарбеков үкіметтегі брифингте. 

Вице-министр бұл мәселеге кешенді түрде қарау қажет екенін атап өтіп, проблемалы учаскелерді жеке-жеке зерттеу керек екенін айтты.

«Мұндай табиғи құбылыстардың қаншалықты жиі болатынын, жауын-шашын көлемін және түсетін жүктемені ескеру керек. Кез келген жоба сараптамадан өткенде аймақтың қалыпты өмір сүру жағдайлары мен стандарт талаптары негізінде қаралады. Жоба мақұлданғанда ықтимал жүктеме де есепке алынады», – деді ол. 

Құрылыс және тұрғын үй-коммуналдық шаруашылық істері комитеті төрағасының орынбасары Нұрсұлтан Керімқұлов соңғы 10 жылда нөсер кезінде су басатын 11 учаскедегі мәселе шешілгенін айтты. 2026 жылы бұл бағыттағы жұмыстарға шамамен 5 млрд теңге бөлінген.

Еске сала кетейік, 23 шілдеде нөсер 15 минуттың ішінде Астананы Венецияға айналдырды.    Жаңбыр салдарынан Астанада көшелерді су басып, құтқарушылар көліктерді эвакуациялап, тұрғындарға қауіпсіз жерге шығуға көмектескен.

Қысқа уақыт ішінде жауған қатты жауын-шашын салдарынан көшелерді су басып, кейбір жолдар шағын көлге айналды. Тұрғындар әлеуметтік желілерде суға толған көшелер мен жүріп өтуге қиын жолдардың бейнежазбаларын жаппай бөлісіп, жағдайдың күрделілігін көрсетті.

Ең қызығы, осы нөсерден кейін Астана көшелерінен жоғалған мемлекеттік нөмір белгілері табылып жатты. Полицияға мемлекеттік тіркеу нөмірі белгілерін жоғалтып алғандарын айтып  жүздеген адам шағым түсірген

Әкімдік бұл жағдайды қысқа уақытта қатты нөсердің жауғанымен түсіндірген.

Оқи отырыңыз:

• 15 минуттық жаңбыр Астананы Венецияға айналдырды 
• Астанадағы нөсерден кейін көшеден 100-ден аса көлік нөмірі табылды
• Астанадағы әуетакси сынағы: Алғашқы вертипорт қайда салынады?